Májilis depýtattary Jeke sáıkestendirý nómirin berý merzimin uzartý bastamasyn kóterip otyr
ASTANA. Mamyrdyń 20-sy. QazAqparat /Rýslan Ǵabbasov/ - Búginde Jeke sáıkestendirý nómirin (JSN) elimizdiń 1 mıllıon 200 myń adamy, al Bıznesti sáıkestendirý nómirin (BSN) 180 myń zańdy tulǵa alǵan joq. Bul týraly búgin Astanada ótken brıfıngte Ádilet mınıstrliginiń resmı ókili Erbol Erimbetov málim etti,
dep habarlaıdy QazAqparat.
«JSN-di alý merzimin uzartý boıynsha toqtalatyn bolsaq, qoldanystaǵy zańnamaǵa sáıkes JSN-di alý bıylǵy jylǵy tamyzdyń 13-ine deıin qarastyrylǵan. Qazirgi kezde Májilis depýtattary zańnamaǵa bul merzimdi, ıaǵnı JSN men BSN-ǵa túpkilikti kóshýdi 2012 jylǵy qańtardyń 1-ine deıin uzartýdy kózdeıtin túzetý engizýge bastama jasady»,- dedi resmı ókil.
«Alaıda zań áli qabyldanǵan joq. Sondyqtan 2010 jylǵy tamyzdyń 13-ine belgilengen merzim óz kúshinde»,-dep atap ótti E. Erimbetov.
Budan buryn habarlanǵandaı, jeke kýáliginde jáne tólqujatynda Jeke sáıkestendirý nómiri (JSN) joq azamattar bıylǵy jylǵy tamyzdyń 13-ine deıin ádilet organdaryna nemese Halyqqa qyzmet kórsetý ortalyqtaryna mindetti túrde barýy qajet. Sebebi, atalǵan merzimnen keıin JSN-i joq jeke kýálik pen tólqujattar jaramsyz bolyp qalady. Atalǵan qujattardy JSN-i bekitilgen qujatqa aýystyrý tegin júrgiziledi. Atap aıtqanda, JSN el azamattarynyń tólqujattarynda 1997 jyldan beri basylyp keledi. Esterińizge sala keteıik, bıylǵy jylǵy naýryz aıynda E. Erimbetov tamyzdyń 13-inen bastap Salyq tóleýshiniń tirkeý nómiri men Áleýmettik jeke kod bolmaıtynyn aıtqan bolatyn. Tıisti tirkeý sharalary tek qana JSN arqyly júrgiziledi. Aıta keteıik, 12 sannan turatyn JSN jeke kýáliktiń betki jaǵynda týǵan kúnniń málimetteri jazylǵan jolaqtyń astynda belgilengen. Al tólqujatta ol 32-shi bette basylǵan.
Budan buryn habarlanǵandaı, depýtat Ýálıhan Qalıjan Jeke sáıkestendirý nómirin berý isinde qosymsha uıymdastyrý sharalary atqarylýy qajet ekenin málimdegen bolatyn.
«Jurtshylyq arasynda azamattardyń jeke kýáligi men tólqujatyna jeke sáıkestendirý nómiriniń engizilýine baılanysty úlken qobaljýlar oryn alyp otyr. 2010 jylǵy tamyzdyń 13-inen bastap Qazaqstanda azamattardyń tıisti qujattarynda JSN bolmaǵan jaǵdaıda ondaı qujattardyń kúshi bolmaıtyndyǵy belgili. Osy kún jaqyndaǵan saıyn jurtshylyq arasyndaǵy dúrbeleń de ulǵaıyp barady», dedi depýtat. Onyń aıtýynsha, búgingi kúni halyqqa qyzmet kórsetý ortalyqtarynda uzyn-sonar kezekter qalyptasyp, tipti bul máselege «ádettegideı» deldaldar da aralasyp jatqan kórinedi.
