Májilis depýtattary Jeke sáıkestendirý nómirin berý merzimin 2012 jylǵa deıin uzartýǵa baǵyttalǵan zań jobasyna bastamashylyq jasady
ASTANA. Mamyrdyń 25-i. QazAqparat /Qanat Mámetqazyuly/ - Búgin QR Parlamenti Májilisi Zańnama jáne sot-quqyqtyq reforma komıtetiniń keńeıtilgen otyrysy bolyp ótti. Onda Májilis depýtattary bastama jasaǵan «QR keıbir zańnamalyq aktilerine ıdentıfıkatsııalyq nómirler máseleleri boıynsha ózgerister men tolyqtyrýlar engizý týraly» zań jobasy jumysqa alyndy,
dep habarlaıdy QazAqparat.
Toqtala ketetin jaıt, «Nur Otan» partııasy janyndaǵy Qoǵamdyq keńestiń jumysy barysynda azamattarǵa Jeke sáıkestendirý nómirin (JSN) berýge qatysty máseleler talqylanyp, onda birqatar problemalar aıqyndalǵan. Budan bólek, Májilis depýtattary da JSN engizýge qatysty Halyqqa qyzmet kórsetý ortalyqtarynda oryn alǵan jaǵdaılarǵa alańdaýshylyq bildirgen bolatyn. «JSN engizilýine, ony berý merziminiń aıaqtalýyna baılanysty jurtshylyq arasynda birshama qobaljýlar oryn alǵany belgili. Bundaǵy basty másele «Identıfıkatsııalyq nómirler týraly» zań 2007 jyly kúshine engen bolatyn, qoldanystaǵy osy zańda JSN berý merzimi 2010 jylǵy tamyzdyń 13-inde aıaqtalady dep jazylǵan. Alaıda, qazirgi jaǵdaı oǵan kereǵar bolýda. Osyǵan oraı, depýtattar osy zań jobasynda JSN engizý merzimin 2012 jylǵy qańtardyń 1-ine deıin uzartý týraly norma usynyp otyr», dedi bastamashy depýtattyń biri Iraq Elekeev.
Budan buryn habarlanǵandaı, jeke kýáliginde jáne tólqujatynda Jeke sáıkestendirý nómiri (JSN) joq azamattar bıylǵy jylǵy tamyzdyń 13-ine deıin ádilet organdaryna nemese Halyqqa qyzmet kórsetý ortalyqtaryna baryp, qujattaryn aýystyrýlary qajet bolatyn. Qujatty aýystyrý tegin júrgizilýde. JSN el azamattarynyń tólqujattarynda 1997 jyldan beri basylyp keledi. Aıta keteıik, 12 sannan turatyn JSN jeke kýáliktiń betki jaǵynda týǵan kúnniń málimetteri jazylǵan jolaqtyń astynda belgilengen. Al tólqujatta ol 32-shi bette basylǵan.
Talqylaý barysynda komıtet depýtattary atalǵan zań jobasyn biraýyzdan qoldady. Sonymen birge, jıyn barysynda jumys tobynda qaralǵan soń, zań jobasyn palatanyń jalpy otyrysyna shyǵarý týraly sheshim qabyldandy.
