Májilis depýtattary «Jaıylymdar týraly» jańa zań jobasyn ázirledi
ASTANA. QazAqparat - Parlament Májilisindegi «Nur Otan» fraktsııasynyń bir top depýtattary «Qazaqstan Respýblıkasyndaǵy jaıylymdar týraly» jańa redaktsııadaǵy zań jobasyn ázirledi. Bul týraly búgin Májiliste jaıylymdardy tıimdi basqarý men paıdalaný máselelerine arnalǵan dóńgelek ústel barysynda málim boldy.
«Búgingi qoldanystaǵy zańnamalyq aktiler jaıylymdyq jerlerdi tıimdi paıdalaný men basqarý boıynsha máselelerdi sheshe almaıdy. Sondyqtan da, «Nur Otan» fraktsııasynyń depýtattary jaıylymdar týraly jańa zań jobasyn ázirledi. Onda búgin oryn alyp otyrǵan olqylyqtar eskeriledi, jaıylymdardy tıimdi basqarýǵa tetikter qamtylady», - dedi depýtat Jeksenbaı Dúısebaev.
Onyń sózine qaraǵanda, jańa zań jobasyndaǵy basty jańalyqtardyń biri mal sharýashylyǵy úshin qajetti jerlerdi tıimsiz paıdalanýmen kúres bolyp otyr. Óıtkeni, dál osyndaı tıimsiz paıdalaný saldarynan otandyq mal sharýashylyǵy úlken zalal kórýde.
«Bizdiń mal jaıylymy salasyndaǵy qolda bar resýrstarymyz óte zor. Sol úshin mal sharýashylyǵynda jemge qajettilik suranysynyń 50 paıyzy dál osy jaıylymdyq jerlerden alynýy kerek edi. Alaıda, is júzinde jaıylymdardyń basym bóligi búlinip, tozǵandyqtan, óristegi mal jaıylymdyq jemniń 30 paıyzyn da bere almaı otyr. Álemdik tájirıbede kórsetilgendeı otarlap, shalǵaıǵa óristep jaıylǵan mal , aýyl mańynan alysqa shyqpaı jaıylǵan malǵa qaraǵanda salmaqty 10 kelige artyq jınaıtyny dáleldengen», - deıdi depýtat Jeksenbaı Dúısebaev. Osyǵan oraı, zań jobasynda depýtattar maldy aýyl mańynan shalǵaıǵa otarlatyp jaıýdy damytý arqyly jaıylym jerlerin keńeıtýdi usynady.
Tutastaı alǵanda, zań jobasyn birqatar áleýmettik, ekonomıkalyq jáne ekologııalyq nátıjelerge negizdeledi. Atap aıtqanda, birinshiden, halyqty sapaly ári arzan mal ónimderimen qamtamasyz etýge múmkindik beredi, ekinshiden, et eksportynyń áleýetin arttyrady, úshinshiden, jeke qosalqy sharýashylyqtardy jáne shalǵaıdaǵy mal sharýashylyǵyn damytýǵa, mal basyn arttyrýǵa, jemshóp qoryn daıyndaýǵa, sondaı-aq, ekologııalyq turǵydan taza mal sharýashylyǵy óniminiń ózindik qunyn tómendetýge jaǵdaı jasaıdy.
Aıta keterligi, zań jobasy qazirgi ýaqytta Úkimetke tıisti qorytyndylar alý úshin joldanǵan eken.
