Májilis depýtattary Jambyl jáne Qaraǵandy oblystaryna saparmen bardy
NUR-SULTAN. QazAqparat – Májilis depýtattary Jambyl jáne Qaraǵandy oblystaryna saparmen bardy, dep habarlaıdy QazAqparat Májilistiń baspasóz qyzmetine silteme jasap.
Búgin Májilis depýtaty Marat Bopazov Jambyl oblysyna sapary barysynda Taraz qalasyndaǵy kondıterlik fabrıka jumysymen tanysty.
Osydan eki jyl buryn jabdyq jáne kommertsııalyq jyljymaıtyn múlikti qaıta jańartyp, vaflı óndiretin jeli satyp alýǵa nesıe alǵan fabrıka búgingi tańda jylyna 2160 tonnaǵa jýyq ónim óndirýde.
Halyq qalaýsymen kezdesýde kásipkerler zaýyttyń jumysy men tynys-tirshiligi týraly jan-jaqty aıtyp, fabrıkanyń joba quny 850 mıllıon teńge bolatyn ekinshi kezeńiniń qurylysy aıaqtalýǵa jaqyn ekendigine toqtaldy.
Joba bıyl iske qosylyp, kásiporynnyń tolyq jyldyq qýaty 4500 tonna bolady dep josparlanýda. Osyǵan oraı, taǵy jetpis adamdyq jumys orny ashylǵan. Jobanyń ekinshi kezeńi osy jyldyń aıaǵynda paıdalanýǵa berilmek. Sonymen qatar bıyl jańa korpýs qurylysy men jańa óndiristik jelilerdi satyp alý kózdelgen. Zamanaýı jabdyqtardy iske qosý kásiporyn qýattylyǵyn 4500 tonnadan 12 000 tonnaǵa deıin ulǵaıtýǵa, sondaı-aq, ónimderdi eksportqa shyǵarýǵa jol ashyp, qosymsha 170 jańa jumys orny ashylmaq.
Bul «Bıznestiń jol kartasy – 2020» memlekettik baǵdarlamasy arqyly qomaqty qarjyǵa nesıe alyp, jumysyn jandandyryp otyrǵan kásiporyn óńir ekonomıkasyn arttyrýǵa óz úlesin tıgizip otyrǵanyn kórsetedi.
Osyǵan sáıkes, Májilis depýtaty memleket tarapynan kásipkerlikke kórsetilip jatqan qoldaýdyń mańyzdylyǵyna mán berdi.
Sondaı-aq, májilis depýtattary Mansurhan Mahambetov pen Jambyl Ahmetbekov Qaraǵandydaǵy Kóshi-qon qyzmetteri ortalyǵyna bardy.
Májilis depýtattary ortalyqtyń jumysymen tanysyp, memlekettik qyzmetterdi alý úshin mekemege kelgen sheteldik azamattarmen áńgimelesti.
«Tsıfrly Qazaqstan» baǵdarlamasy boıynsha Elbasymyz alǵa qoıǵan mindetterdi júzege asyrý aıasynda búgin biz ortalyq qyzmetimen tanystyq. Barlyq kóshi-qon qyzmetteri «bir tereze» qaǵıdaty negizinde usynylýda. Buryn qujat alý úshin birneshe mekemege habarlasyp, oǵan 7 kún qajet bolsa, qazir qujattardy ortalyqtan bir saǵatta alýǵa bolady. Eń bastysy, bul halyq úshin óte yńǵaıly, - dedi Májilis depýtaty M. Mahambetov.
Sheteldikter men azamattyǵy joq adamdarǵa kórsetiletin memlekettik qyzmetterdiń sapasyn jaqsartý jáne eńbekshi-mıgranttardy zańdastyrý maqsatynda Kóshi-qon qyzmetteri ortalyǵy – «Azamattarǵa arnalǵan úkimet» memlekettik korporatsııasynyń jáne Qazaqstan Respýblıkasy Іshki ister mınıstrliginiń birlesken jobasy.
Búgingi tańda qala ortalyǵynda ornalasqan ortalyq birneshe qyzmet túrlerin kórsetedi. Munda kelýshiler úshin barynsha jaǵdaı jasalǵan. Sondaı-aq, eńbek mıgranttaryna yńǵaıly bolý úshin ortalyqta densaýlyq saqtaý, ekinshi deńgeıli bankter jáne saqtandyrý kompanııalarynyń ókilderi jumys isteıdi.
