Májilis depýtattary zań jobalaryna júrgiziletin saraptaý jumystarynyń sapasyn jetildirýge qatysty máselelerdi talqyǵa saldy
ASTANA. Maýsymnyń 4-i. QazAqparat /Aıdar Ospanalıev/ - Búgin Astanada «Nur Otan» partııasy janyndaǵy Quqyqtyq keńestiń uıymdastyrýymen zań jobalaryn saraptaý jumystarynyń sapasyn arttyrýǵa baǵyttalǵan halyqaralyq dóńgelek ústel otyrysy ótti,
dep habarlaıdy QazAqparat.
Atalmysh sharaǵa Parlament depýtattary men Prezıdent Ákimshiliginiń mınıstrlikter men vedomstvolardyń, úkimettik emes jáne halyqaralyq uıymdardyń ókilderi men ǵalym sarapshylar qatysty. Basqosýda olar zań jobalarynyń sapasy men ony jetildirýge qatysty qalyptasyp otyrǵan keń aýqymdy máselelerdi sóz etti.
Otyrysta kún tártibindegi másele jóninde sóz qozǵaǵan Májilis depýtaty Nurlan Ábdirovtyń sózine qaraǵanda, zań jobalarynyń sapasyn kásibı ári jan-jaqty baǵalaý Parlamentke memlekettiń zań shyǵarýshy organy retinde asa mańyzdy. «2004 jyldyń maýsym jáne qazan aılarynda «Normatıvti quqyqtyq aktiler týraly» zańynyń
22-shi babyna túzetýler engizildi. Qazirgi tańda osy zańǵa engizilgen jańa talaptar boıynsha Parlamentke engiziletin zań jobalaryna quqyqtyq, ekologııalyq, qarjylyq, jemqorlyqqa qarsy jáne ózge de ǵylymı saraptamalar júrgizý mindetti. Bul rette zań jobalaryna júrgiziletin saraptaýlardyń túrleri atalmysh aktiler retteıtin quqyqtyq qatynastarǵa baılanysty. Atalmysh talaptar tek Prezıdent engizgen zań jobalaryna ǵana qoldanylmaıdy», dedi depýtat.
Onyń pikirinshe, zań jobalarynyń sapasyn arttyrýǵa baǵyttalǵan osy tektes quqyqtyq talaptarǵa qaramastan saraptaý salasynda áli de bolsa uıymdastyrýshylyq jáne ózge de birqatar tájirıbelik baǵyttaǵy problemalar qalyptasyp otyr. Óz kezeginde olar Parlament jumysynyń qarqyndy júrýine kedergi keltirýde. «Atalmysh máseleni sheshý úshin oǵan qatysty júıeli sharalar qoldaný qajet. Olaı bolmaǵan kúnde biz Úkimet pen memlekettik organdar bastamashy bolǵan zańdardy udaıy túzetip otyratyn bolamyz», dedi halyq qalaýlysy.
