Májilis depýtattary ýran máselesi jónindegi qaýesetti palatanyń jalpy otyrysynda taǵy bir márte resmı túrde joqqa shyǵarýdy talap etýde
ASTANA. Qańtardyń 12-si. QazAqparat /Qanat Mámetqazyuly/ - Búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń otyrysy barysynda Komıtet tóraǵasy Ámzebek Jolshybekov Syrtqy ister mınıstrligi men QR Energetıka jáne mıneraldyq resýrstar mınıstrligi tarapynan Qazaqstannyń Iran Islam Respýblıkasyna ýran jetkizý týraly áldebir kelisimge qatysy bar degen aqparatty resmı joqqa shyǵarý qajettigin eske saldy.
Depýtat bul turǵyda aldaǵy palatanyń otyrysynda atalǵan másele týraly taǵy bir márte resmı jarııalaýdy ótindi, dep habarlaıdy QazAqparat.
Esterińizge sala keteıik, byltyrǵy jeltoqsannyń sońyna taman QR Syrtqy ister mınıstrligi keıbir BAQ taratqan Iran Islam Respýblıkasyna ýran jetkizý týraly áldebir kelisimge Qazaqstannyń qatysy bar degen aqparatty úzildi-kesildi joqqa shyǵaryp, atalmysh aqparatty el abyroıyna kir keltiretin, negizsiz qaýeset dep málimdegen bolatyn.
«Biraz jurtshylyqty alańdatqan bul másele erteńgi palatanyń jalpy otyrysynda da kóterilýi múmkin. Sol úshin Májilistiń otyrysynda resmı túrde bundaı aqparatty joqqa shyǵarý týraly málimdeme jasalýy shart. Qazirdiń ózinde osyǵan baılanysty neshe túrli alypqashpa áńgimeler bolyp jatyr. Sondyqtan da bundaı málimdemeniń resmı kúshi men salmaǵy da bolýy tıis», - dedi Komıtet tóraǵasy Á. Jolshybekov.
Toqtala ketetin jaıt, jeltoqsannyń 30-ynda QR Syrtqy ister mınıstrligi ýran máselesine qatysty aqparatty joqqa shyǵarǵan bolatyn. Onda : «Álemde tórtinshi zymyrandyq-ıadrolyq arsenaldan óz erkimen bas tarta otyryp jáne álemdegi ekinshi iri Semeı synaq alańyn jabý arqyly Qazaqstan dúnıe júzi memleketteri moıyndaǵan álemdik qarýsyzdaný men qarýdy taratpaý protsesiniń kóshbasshylarynyń biri bolyp tabylady. Qazaqstan jappaı qyryp-joıý qarýyn taratpaý jáne qosarly qoldanys materıaldaryn qatań baqylaýda ustaý qaǵıdattaryn qaltqysyz ustanady. Qazaqstandaǵy ıadrolyq materıaldarǵa qatysty barlyq sharalar, onyń ishinde atom energetıkasyn beıbit maqsatqa qoldaný salasyndaǵy basqa eldermen yntymaqtastyǵymyz, Halyqaralyq atom energııasy jónindegi agenttigi bergen jan-jaqty kepilderge sáıkes júzege asýda. Qazaqstan taratylǵan aqparatqa Halyqaralyq atom energııasy jónindegi agenttik tarapynan tıisti baǵa beriletinine senedi», - delingen QR Syrtqy ister mınıstrliginiń habarlamasynda.
