Májilis depýtattary Ulttyq ǵarysh ortalyǵynda kóshpeli otyrys ótkizdi
Qazaqstan Respýblıkasynyń Parlamenti Májilisiniń Ekologııa máseleleri jáne tabıǵat paıdalaný komıtetiniń, sondaı-aq ǵarysh qyzmeti boıynsha zań jobasy jónindegi jumys tobynyń múddesin qorǵaıtyn depýtattar toby Astana qalasyndaǵy Ulttyq ǵarysh ortalyǵynda (UǴO) boldy.
Májilis depýtattary UǴO-nyń atqaryp otyrǵan jumysymen, Jerdi qashyqtyqtan zondtaý ǵarysh júıesiniń (JQZ ǴJ) jerústi ınfraqurylymy, dáldigi joǵary spýtnıktik navıgatsııa júıesi (DJSNJ) qyzmetimen tanysty. Ǵarysh apparattaryn qurastyrý-synaý kesheni (ǴA QuSK) qurylysynyń barysyn kórip, JQZ ǵarysh apparattaryn basqarý jáne ǵarysh túsirilimderin óńdeý ortalyqtaryndaǵy «Qazaqstan Ǵarysh Sapary» Ulttyq kompanııasy» AQ mamandarynyń jumys oryndaryna bardy.
Qazaqstan Respýblıkasy Investıtsııalar jáne damý mınıstrliginiń Aeroǵarysh komıteti tóraǵasynyń orynbasary Meıirbek Moldabekov is-sharalar barysynda depýtattyq korpýstyń ókilderine respýblıkadaǵy ǵarysh salasynyń qaı kezeńde damyp jatqany týraly áńgimelep berdi.
«Elimizde mańyzdy ǵarysh ınfraqurylymy quryldy, ony paıdalaný men tıimdi qoldaný quqyqtyq jáne zańnamalyq aktilerdi qajet etedi», - dep atap ótti M. Moldabekov.
Ǵarysh qyzmeti týraly zańǵa ózgerister men tolyqtyrýlar engizý jónindegi jumys tobynyń músheleri Qazaqstannyń múddesinde ǵarysh tehnologııalaryn qoldaný týraly «Qazaqstan Ǵarysh Sapary» Ulttyq kompanııasy» AQ prezıdentiniń mindetin atqarýshy Marat Nurǵojınniń baıandamasyn asa qyzyǵýshylyqpen tyńdady. Atap aıtqanda, elimizdiń ekonomıkasy úshin JQZ qazaqstandyq spýtnıkteriniń ónimderi men qyzmetterin tájirıbede paıdalaný týraly áńgime boldy.
Májilis depýtattarynyń kóshpeli otyrysyna qatysqan Qazaqstan Respýblıkasynyń Investıtsııalar jáne damý vıtse-mınıstri Albert Raý: «Qazirgi ýaqytta «Ǵarysh qyzmeti» Zańyna mańyzdy ózgerister men tolyqtyrýlar engizýdi talap etedi», - dep atap ótti.
Qazaqstan Respýblıkasynyń Parlamenti Májilisiniń Ekologııa máseleleri jáne tabıǵat paıdalaný komıtetiniń tóraǵasy Aleksandr Mılıýtın UǴO-ny aralap bolǵan soń, Qazaqstannyń zamanaýı ǵarysh ınfraqurylymǵa ıe ekenin, ol bizdiń elimizge álemniń ǵaryshtyq derjavalarynyń qataryna kirýine quqyq beretinin atap ketti.
Qazǵarysh basshysy Talǵat Musabaev depýtattarmen ótken kezdesýdiń sońynda elimizdiń zań qabyldaýshylaryna ǵarysh qyzmetine erekshe nazar aýdaryp jáne Qazaqstannyń ǵarysh salasyn qurý jolynda Qazǵaryshtyń atqaryp otyrǵan jumysyna qoldaý kórsetip otyrǵandaryna alǵys aıtty.
