Májilis depýtattary Túrkistan oblysyndaǵy problemaly nysandarǵa bardy
Atap aıtqanda, 300 oqýshyǵa arnalǵan Qaınarbulaq aýylyndaǵy Shoqan Ýálıhanov atyndaǵy jalpy orta mektebi. Bilim ordasy 2009-2010 oqý jylynda paıdalanýǵa berilgen. Bıylǵy oqý jylynda 522 oqýshy bilim alýda. Qazirgi tańda mekteptiń 1 qabatynda ornalasqan birqatar synyptar men bólmelerdiń qabyrǵalary jarylyp, edenderi tómen tússe, 2 qabattaǵy kabınetterdiń shatyrynan sý ótken. Jylytý júıesi durys júrgizilmegeniniń saldarynan bólmelerdiń temperatýrasy óte tómen. Syrtqy ájethananyń da jaǵdaıy máz emes qabyrǵalary men edenderi jarylǵan. Degenmen tekseris barysynda apatty dep tanylmaǵan.
Mektep ǵımaratyna kúrdeli jóndeý jumystaryn júrgizý úshin jobalyq-smetalyq qujattar ázirlenip, memlekettik saraptama qorytyndysyna 2020 jyldyń jeltoqsan aıynda tirkeýge alynǵan. Monıtorıng barysynda Darhan Myńbaı máseleler eskerýsiz qalmaıtynyn aıtty.
«Jalpy Túrkistan óńirinde mektep salý máselesi kún tártibinen túsken emes, túspeıdi de. Tipti, myna 300 balaǵa arnalǵan mektepti 5-10 jylda taǵy 600 balaǵa salý kerek bolady. Sondyqtan salý, josparlaý, qadaǵalaý, bekitý máselesinde kóp kemshilikter bar. Balalardyń ómirine qaýip tóndirýmen birdeı. Jalpy bilim mınıstrliginen bastap jaýaptylar ózderiniń mindetterin durystap oryndamasa bul másele toqtamaıdy. Toqtatýdyń eń basty joly - zańǵa baǵynýshylyq. Sapar barysynda túıgen negizgi problemalardy Parlamentte kóteretin bolamyn. Tıisti mınıstrliktermen birge zań aıasynda sheshýge yqpal etemin. Túrkistan óńirinde mektepterdiń jetispeýshiligi eń birinshi aıtatyn máselem bolady. Osyndaı problemalar kóp. Biraq negizgi problemalardy túzetsek, Túrkistan óńiriniń áleýeti zor», – dedi ol.
Ekinshi nysan – Qarasý aýylynda salynatyn kópqabatty turǵyn úıler. Jalpy úılerdiń sany – 5 , al páter sany – 300. Bıyl qurylys jumystary bastalý kerek bolǵan nysan respýblıkalyq bıýdjetten qarjy bólýdi qajet etedi.
Májilis depýtattary atalǵan nysandardyń qurylys jumystaryna jaýapty mekeme basshylarymen kezdesip, máselelerdi jan-jaqty talqylady. Sheshimin kútken problema endi Parlament otyrystarynda jaýapty mınıstrliktermen birge qaralmaq.
«Jergilikti bıliktiń kóterip otyrǵan máseleleri qoǵamǵa qajet. Búgingi saparymyzda olardyń usynǵan turǵyn úı máselesin sheshý jáne sport keshenin salýdy qoldaý úshin óz tarapymyzdan yqpal jasaımyz. Mektepke baılanysty shuǵyl sharalar qoldanýymyz kerek. Qurylystyń sapasyzdyǵy osyndaı jaǵdaılarǵa ákelip soǵady. ıAǵnı bıýdjettik qarajatty tıimdi paıdalanbaýdyń saldary dep aıta alamyn», - dedi depýtat Qaınar Abasov.
