Májilis depýtattary Túrkistan oblysynda 130-dan astam kezdesý ótkizip, el ótinishin tyńdaıdy
TÚRKІSTAN. QazAqparat - Májilis depýtattary Túrkistan oblysynda 130-dan astam kezdesý ótkizip, el ótinishin tyńdaıdy, dep habarlaıdy QazAqparat tilshisi.
Túrkistan oblysyna QR Parlamenti Májilisiniń depýtattary jumys saparymen keldi. Olar bir apta boıy óńirdegi 17 aýdan, qalany aralap, turǵyndarmen kezdesedi. Búgin Túrkistan oblysy ákiminiń birinshi orynbasary Arman Jetpisbaı halyq qalaýlylarymen kezdesip, ózekti máselelerdi sóz etti.
Oblys ákiminiń birinshi orynbasary Túrkistan qalasyn damytýdyń birinshi kezeńi aıaqtalyp, ınfraqurylymy tolyq qalanǵanyn málimdedi. Túrkistan oblysyn damytýdyń keshendi josparyna sáıkes aýdan, qalalarda, eldi mekenderde tıisti jumystar atqarylyp jatqanyn jetkizdi.
Depýtattar – Darhan Myńbaı, Qaınar Abasov, Erjan Qudaıbergen jáne Syrym Ertaev oblysqa kelýdegi maqsattaryna toqtaldy. Olar aýyl sharýashylyǵy, aýyz sý, aǵyn sý, gaz máselesin retteý, ındýstrıaldy aımaqtardy damytý, eldiń áleýmettik jaǵdaıyn kóterý baǵytyndaǵy josparlardy talqylady.
– Biz issaparymyzda daıyn kásiporyndar emes, problemasy bar aýmaqtardy aralap, turǵyndarmen kezdesýdi josparlap otyrmyz. Ózekti máselelerdi kózben kórip, sheshý joldaryn qarastyramyz. Maqsatymyz – óńir turǵyndarynyń ótinishterin tyńdaý, Túrkistan oblysyn damytý baǵytyndaǵy jobalardyń júzege asyrylýyna zańdyq negizde kómektesý. Birlesip jumys atqarylsa ǵana is alǵa basady, – dedi Darhan Myńbaı.
«Nur Otan» partııasy Túrkistan oblystyq fılıalynyń birinshi orynbasary Beısen Tájibaev Májilis depýtattary barlyq aýdan, qalada 130-dan astam kezdesý ótkizip, qoǵamdyq qabyldaýlar uıymdastyrylatynyn jetkizdi. Qoǵamdyq qabyldaýlar kestesi partııa fılıaldarynyń áleýmettik jelidegi paraqshalaryna jarııalanǵanyn málimdedi. Sonymen birge Jol kartasyna engizilgen jobalardyń iske asyrylý barysy da talqylanatynyn aıtty.
