Májilis depýtattary turǵyn úı qurylysy jınaq aqshasy týraly zańǵa tolyqtyrýlar engizýdi kózdeıtin zań jobasyn qolǵa alady
ASTANA. 2 maýsym. QazAqparat - 4 maýsym, dúısenbi kúni, Májiliste «Qazaqstan Respýblıkasyndaǵy turǵyn úı qurylysy jınaq aqshasy týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasynyń tanystyrylymy ótedi.
Osy sharany Májilistiń Qarjy jáne bıýdjet komıteti uıymdastyryp otyr. Bul jóninde Májilistiń baspasóz qyzmeti habarlady.
Zań jobasy jóninde QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın baıandama jasap, qandaı túzetýler engiziletini týraly depýtattarǵa túsinik beredi dep kútilýde. Osy zań jobasy boıynsha qurylǵan jumys tobyna Májilistiń Qarjy jáne bıýdjet komıtetiniń múshesi Nurtaı Sabılıanov jetekshilik jasaıdy.
Zań jobasy turǵyn úı qurylysy jınaq júıesin damytýǵa jáne turǵyn úı qurylysy jınaq júıesiniń sýbektileri arasynda onyń jumys isteýine baılanysty týyndaıtyn qatynastardy retteýge baǵyttalǵan.
