Májilis depýtattary Tekeliniń kásiporyndaryn aralady
TALDYQORǴAN. QazAqparat - Almaty oblysyna issaparmen QR Parlamenti Májilisiniń depýtattary keldi. Halyq qalaýlylary Tekeli qalasynda bolyp, ondaǵy birneshe kásiporynnyń eńbek ujymdarymen kezdesti, dep habarlaıdy QazAqparat tilshisi.
Elbasynyń partııa sezinde bergen tapsyrmalaryna oraı, QR Parlamenti Májilisiniń depýtattary Marat Bopazov, Ersultan Bekturǵanov, Janat Jarasov Tekeli qalasynyń eń úlken jylyjaıda bolyp, qalanyń jylý energetıkalyq kesheninde jumysshylarmen júzdesti. Eki ujymda da halyq qalaýlylary «Nur Otan» partııasynyń HVIII seziniń qorytyndysy, partııanyń «Baqýatty qoǵam: on jyldyqqa on maqsat» baǵdarlamasyn túsindirdi.
Sharaǵa «Nur Otan» partııasy Tekeli qalalyq fılıalynyń tóraǵasy Baqtııar Ónerbaev, tóraǵanyń birinshi orynbasary Marǵulan Botantaev, qala turǵyndary, barlyq deńgeıdegi máslıhat depýtattary, mekeme basshylary, úkimettik emes jáne BAQ ókilderi qatysty.
«Halyqpen kezdesýde birinshi kezekte, Elbasy Nursultan Ábishuly Nazarbaevtyń áleýmettik bastamalarynyń júzege asyrylý barysyna, onyń ishinde, turmysy tómen jáne kópbalaly otbasylardy qoldaý sharalaryna erekshe kóńil bólinedi. Biz osy baǵytta qabyldanǵan zańnamalyq túzetýler, sondaı-aq jalpy zań shyǵarýshylyq jumystar jóninde baıandaýdy jón sanadyq» - dep túsindirdi is sapar barysynda top jetekshisi Ersultan Bekturǵanov.
Al «Green House» JShS ótken kezdesýde biz qyzmetkerlerdiń áleýmettik salaǵa qatysty oılaryn tyńdadyq. Búgingi kúni mańyzdy másele - jalaqyny kóterý, Elbasy, partııa Tóraǵasy nurotandyqtardyń aldyna qoıǵan mańyzdy mindet - halyqtyń áleýmettik ál-aýqatyn kóterý, memlekettik qyzmet pen bıznestiń qoljetimdiligin arttyrý máselesi aıtyldy», - dedi óz sózinde QR Parlamenti májilisiniń depýtaty Marat Bopazov.
Májilismender eńbek ujymy qyzmetkerlerine mindetti áleýmettik medıtsınalyq saqtandyrý, áleýmettik qamsyzdandyrý, turǵyn úı, bilim berý men densaýlyq saqtaý salalary týrasynda oılaryn jetkizip, osy salalarǵa qatysty usynys-tilekterin tyńdady. Kezdesý barysynda jumysshylar da birqatar ózekti áleýmettik máselelerdi qozǵady. Aıtylǵan barlyq usynys, tilekterdi depýtattar óz qaraýyna alyp, jaýapsyz qaldyrmaıtynyna senim bildirdi.
