Májilis depýtattary Taldyqorǵan qalasynyń óndiris oshaqtarymen tanysty
ASTANA. QazAqparat - QR Parlamenti Májilisiniń depýtattary Ábdimanap Bekturǵanov, Amangeldi Dáýrenbaev, Omarhan Óksikbaev Taldyqorǵan qalasyndaǵy «Qaınar AKB» akkýmýlıator zaýytynyń jumysymen tanysty, dep habarlaıdy QazAqparat.
Shara aıasynda kásiporynnyń ákimshilik dırektory Álmesh Sarkýlov pen óndiris boıynsha dırektory Ashat Dolaev depýtattarǵa zaýyttyń jumysyn tanystyryp, akkýmýlıatorlyq batareıalardyń shyǵý óndirisin kórsetti.
«Qaınar AKB» akkýmýlıator zaýyty Qazaqstannyń asa iri akkýmýlıator shyǵarýshylarynyń biri bolyp tabylady (akkýmýlıator batareıalarynyń 73-ten astam túri). Qyzmetkerlerdiń jalpy sany - 765. 2010 jyldan bastap «Qaınar-AKB» JShS qazirgi zamanǵy basqarýshylyq tehnologııasyn - "Kaıdzen" "uqypty" óndiris júıesin engize bastady, onyń maqsaty akkýmýlıator batareıasyn óndirý salasynda TMD sheginde ǵana emes, alys shetelde de kóshbasshylyq pozıtsııaǵa shyǵý bolyp tabylady.
«Sonymen qatar atalǵan Májilis depýtattary Kóksý aýdany Balpyq bı aýylyna qarasty «Kóksý qant zaýyty» jaýapkershiligi shekteýli seriktestiginiń jumysshylarymen kezdesti», - dep habarlaıdy Parlament Májilisiniń baspasóz qyzmeti. Mekemeniń óndiris qýaty - 1800-2000 tonna qant qyzylshasy. Zaýytta 470 qyzmetkerler jumys isteıdi, ortasha aılyq jalaqylary - 50 myń teńge. 2015 jyly bıýdjetten 308 mln. teńge qarjy bólinip, kúrdeli jóndeý jumystary júrgizilgen.
Depýtattar kezdesýdi Balpyq bı aýylyndaǵy «Ýyz Maı Industry» soıa óńdeý zaýytynda jalǵastyrdy. 2016 jyly zaýyt 27 tonna soıa óńdep shyǵardy. Zaýyttyń óndiristik qýaty - táýligine 290 tonna soıa óńdeıdi. Búginde mekemede 100 adam jumys atqarady, ortasha jalaqy - 65 myń teńge. Kompanııa naryqty taǵam ónerkásibiniń barlyq salalaryna arnalǵan soıa jáne estrýzııalanǵan ónimdermen qamtamasyz etý jáne óndirý aıasyndaǵy negizgi baǵyttardy damytýǵa jumys atqaryp keledi. Kompanııa tańdaýly shıkizatty qabyldap, ony zamanaýı, joǵary tehnologııalyq qural-jabdyqpen óńdeıdi jáne seriktesterge ekologııalyq taza ári paıdaly ónimdi qol jetimdi baǵamen jetkizip otyr.
