Májilis depýtattary T.Bıgeldınovtiń qazasyna kóńil bildirip, batyrdy únsizdikpen eske aldy

«Dál qazirgi ýaqytta Almatyda Keńes Odaǵynyń batyry, ulttyq batyrymyz Talǵat Bıgeldınovpen qoshtasyp, aqtyq saparǵa shyǵaryp salýda. Biz, Májilis depýtattary da osy qaıǵyly qazaǵa resmı túrde kóńil bildirýimiz kerek», - dedi jıyn barysynda depýtat Azat Perýashev.

Osyǵan oraı, palata Tóraǵasy Qabıbolla Jaqypov ult batyryn bir mınýttyq únsizdikpen eske alýdy usyndy.

«Májilis depýtattary, depýtattyq korpýs atynan biz batyrdyń týǵan-týystaryna kóńil aıtý jedelhatyn joldaǵanbyz. Árıne, eki márte Keńes Odaǵy batyrynyń qazasy biz úshin orny tolmas ókinish», - dedi spıker Q.Jaqypov.

Eske salaıyq, qarashanyń onynda 93 jasyna qaraǵan shaǵynda eki márte Keńes Odaǵynyń batyry Talǵat Bıgeldınov ómirden ozdy.

Avıatsııa general-maıory, eki márte Keńes Odaǵynyń Batyry Bıgeldınov Talǵat Jaqypbekuly 1922 jyly 5 tamyzda Aqmola oblysy Maıbalyq aýylynda týǵan. Saratov jáne Orynbor áskerı avıatsııalyq ýchılışesin bitirgen. Balalyq jáne jastyq shaqtaryn Bishkekte ótkizdi. 16 jasynda aeroklýbqa oqýǵa tústi. 1943 jyldyń qańtarynda Bıgeldınov Kalının maıdanyna keldi jáne alǵashqy shaıqastarda-aq jeńiske jetti.1944 jyldyń 26 qazanynda oǵan Keńes Odaǵynyń Batyry ataǵy berildi. Bul ýaqytqa deıin ol 200 áskerı ushýlar jasady. T.Bıgeldınov Berlın úshin shaıqasqa da qatysty. 1945 jyldyń 27 maýsymynda oǵan ekinshi márte Keńes Odaǵynyń Batyry ataǵy berildi. Ol Keńes Odaǵynyń Batyry ataǵyn eki ret ıelengen 65 áskerı ushqyshtyń biri boldy.

T.Bıgeldınov Otan soǵysyndaǵy óziniń áskerı jolyn qurmetpen aıaqtap, 1945 jyldyń 24 maýsymynda Jeńis sherýine qatysty. 1950 jyly áskerı-áýe akademııasyn aıaqtady jáne 1956 jyldarǵa deıin KSRO Qorǵanys Kúshteriniń qatarynda komandır orynbasary jáne avıatsııalyq polk shtaby basshysy qyzmetterinde jumys istedi. 1956 jyly avıatsııanyń general-maıory T.Bıgeldınov zapasqa ketti. 1957-1970 jyldar aralyǵynda - Azamattyq avıatsııanyń qazaq terrıtorıaldyq basqarmasynyń aǵa ınspektory jáne bastyqtyń orynbasary qyzmetin atqardy, 1968 jyly Máskeý ınjenerlik-qurylys ınstıtýtyn syrttaı bitirip, uzaq ýaqyt boıy QazKSR memlekettik qurylymy júıesinde basshylyq qyzmetterde jumys istedi. T.Bıgeldnınov sondaı-aq Lenın ordenimen, eki ret Qyzyl Tý ordenimen, Otan soǵysynyń ІІ jáne ІІІ dárejeli ordenderimen, Qyzyl Juldyz, Aleksandr Nevskıı, ІІІ dárejeli Dańq jáne ózge de otandyq jáne sheteldik ordendermen jáne medaldarmen marapattalǵan.