Májilis depýtattary stýdentterge Elbasy Joldaýyn túsindirdi
ALMATY. Aqpannyń 10-y. QazAqparat /Erbol Azanbek/ - Búgin QR Parlamenti Májilisiniń vıtse-spıkeri Sergeı Dıachenko men Májilis depýtaty Erjan Rahmetov Almatydaǵy azamattyq avıatsııa akademııasynyń stýdentteri jáne oqytýshylarymen kezdesti,
dep habarlaıdy QazAqparat.
Kezdesýdiń basty taqyryby bıylǵy Elbasy Joldaýy boldy. Májilis depýtattary bunymen qatar byltyrǵy jyly Parlament tarapynan atqarylǵan jumystardy atap ótip, ózderi múshesi bolyp tabylatyn «Nur Otan»HDP-nyń jumysy jaıly da sóz qozǵady.
Sergeı Dıachenkonyń aıtýynsha, byltyrǵy jyly qarastyrylǵan 120 zań jobasynyń 32-i qabyldanyp, júzege asyrylǵan. «Bul zańdar daǵdarys ýaqytynda elimizge qajetti negizgi zań jobalary boldy. Bıylǵy jyly da elimizdiń ómirine qatysty, ásirese áleýmettik mańyzdy baǵyttaǵy zań jobalary qabyldanady dep senemin. Jalpy alǵanda elimiz daǵdarystan esh shyǵynsyz shyǵyp úlgerdi. Bul bizdiń birligimizdiń arqasynda. Aldaǵy ýaqytta da Elbasy bıylǵy Joldaýda kórsetken baǵyttardy negizge ala otyryp, damýǵa bet túzegen kóshimizdi jalǵastyrýymyz qajet. Biz jarqyn bolashaqty qalaımyz. Osy baǵytta birge bolýymyz kerek», dedi S.Dıachenko. Ol sondaı-aq stýdentterge bıylǵy Joldaýdyń ereksheligin atap ótip, árbiriniń muqııat tanysýyn, sondaı-aq árqaısysynyń buǵan úles qosýǵa talpynýy qajettigin aıtty.
Óz kezeginde E.Rahmetov bıylǵy Joldaýdyń erekshe ekendigine toqtaldy. «Bıyl taǵy bir 10 jyldy artqa tastadyq. Bıylǵy Joldaýda aldaǵy 10 jyldyń maqsat-mindetteri aıtylǵan. Daǵdarysqa qaramastan Elbasy bárimizdi bolashaqqa kúdiksiz kóz tastap, jaltaqsyz damýǵa qadam jasaýdy usynyp otyr. Sondyqtan Joldaýda kórsetilgen maqsattardyń oryndalýyna úles qosý - paryz», dedi Májilis depýtaty.
