Májilis depýtattary soǵys ardagerlerin kommýnaldyq tólemderden birjolata bosatýdy suraıdy
ASTANA. QazAqparat - Uly Otan soǵysyna qatysqan ardaqty ardagerlerdi kommýnaldyq tólemderden birjolata bosatýymyz kerek. Búgin Májilistiń jalpy otyrysynda Úkimet basshysynyń atyna joldaǵan saýalynda depýtat Aldan Smaıyl osy máseleni kóterdi.
«Uly Otan soǵysy sekildi surapyl adamzat tarıhynda bolǵan emes. 30 mln.-ǵa tarta adam ajal qushty, san myńdaǵan bozdaq qyrshyn ketti. Kontslagerlerde jan túrshigerlik azaptan ólgender men zorlyq-zombylyqqa ushyraǵandaryń jan zary áli kúnge estiletindeı. Fashızmniń jyrtqyshtyǵy men jaýyzdyǵy ortaǵasyrlyq ınkvızıtsııadan áldeqaıda asyp tústi. Adamzattyń jartysyna quldyq, jartysyna joıylyp ketý qaýpin týdyryp, tirshilik tynysyn taryltty. Mine, osyndaı aqyrzamannan jer jahandy qutqaryp qalǵan erler «adamzatty azat etýshiler» deýge laıyq», - deıdi A.Smaıyl.
Depýtat búginde sol qaharmandardyń qatary ábden sıregenin aıtady. Onyń ishinde Qazaqstandaǵy ardagerler sany 6 300 ǵana. Onda da kóbiniń jasy 90-nan asqan.
«Máskeýdi qorǵaǵan, Kıevti azat etken, Eýrazııaǵa tynyshtyqty qaıtaryp bergen, Berlınge jeńis týyn tikken batyrlar endi aqsaqaldy aldııarlar. Endeshe, osy ardaqty ardager atalarymyzdy, barshamyzǵa búgingi beıbit ómir syılaǵan asyldarymyzdy Uly Jeńistiń 70 jyldyǵy qarsańynda qurmettep, qýantaıyq. Olardy kommýnaldyq-turmystyq tólemderden birjolata bosataıyq. Sýdy da, jylýdy da, elektr qýatyn da tegin paıdalansyn. Keýdesin oqqa tósegen erlerdi ónegeli urpaqtyń júrek jylýyna osylaı bólesek ıgi», - dedi depýtat A.Smaıyl.
Bul saýalǵa Májilistiń birqatar depýtattary qol qoıǵan.
