Májilis depýtattary ShQO sýdıalarymen kezdesti
ASTANA. QazAqparat - Parlament Májilisiniń depýtattary Shyǵys Qazaqstan oblystyq sotynda bolyp qaıtty, dep habarlaıdy oblystyq sottyń baspasóz qyzmeti.
Zańnama jáne sot-quqyqtyq reforma komıtetiniń múshesi Vasılıı Oleınık jáne qarjy jáne bıýdjet komıtetiniń múshesi Aleksandr Sýslov oblystyq sottyń sýdıalarymen kezdesti.
Kezdesýde V.Oleınık Májilistiń zań shyǵarý jumystary jóninde keńinen aıtyp ótti. Ásirese, Zańnama jáne sot-quqyqtyq reforma komıtetiniń atqaratyn qyzmeti týraly, birqatar qoldanystaǵy zańnamalardaǵy, qylmystyq-protsestik kodeksindegi ózgerister týraly aıtty. Depýtat sot júıesiniń aldynda turǵan naqty mindertter, tergeý sýdıasynyń qylmystyq protsestegi atqaratyn róli, olardyń ókilettiligi jóninde keńinen toqtalyp ótti.
Depýtat A.Sýslov: «Memleket basshysymen birlesip, biz úlken jetistikterge qol jetkizdik. Búginde tuǵyry berik, myqty - táýelsiz Qazaqstannyń azamattarymyz dep maqtanyshpen aıta alamyz. Bul sózder «Máńgilik eldiń» patrıottyq aktisi, bizdiń ár bireýimiz úshin eń baǵalysy, aqıqaty - otbasymyzdyń ál-aýqaty, eńbeqqorlyǵymyz ben qonaqjaılylyǵymyz, turaqtylyq, erteńgi kúnge degen senimdiligimizdiń belgisi», - dedi.
Kezdesýdiń sońynda Shyǵys Qazaqstan oblystyq sotynyń tóraǵasy Dosjan Ámirov depýtattarǵa adal ári minsiz jumystary úshin alǵysyn bildirip, zań shyǵarý qyzmetterine sáttilikter tiledi.
