Májilis depýtattary Shardarada sý baǵasynyń qymbattaýyna qatysty másele kóterdi

NUR-SULTAN. QazAqparat - Májilis depýtattary Naýryz merekesine arnalǵan demalystarda óńirlerdi aralap, halyqtyń muń-muqtajymen tanysýda, dep habarlaıdy QazAqparat Májilistiń baspasóz qyzmetine silteme jasap.

Depýtat Erjan Qudaıbergen Túrkistan oblysynyń Shardara aýdanyna bardy. Onda aǵyn sý problemasyn jáne «Kaz-Sý» sharýashylyǵy mekemesiniń qyzmetine narazy sharýa dıhandarymen, aýdan máslıhat depýtattarymen kezdesti.

Jıynǵa Ekologııa, geologııa jáne tabıǵı resýrstar vıtse mınıstri Serik Qojanııazov arnaıy issaparmen keldi.

Kezdesýde turǵyndar tarapynan aǵyn sýdy ýaqytyly berýdi jáne sý baǵasynyń tym qymbattaýyna qatysty máseleler kóterildi.

Sonymen qatar sý jetkizip berýshi mekemeniń monopolııa tártibin óreskel buzyp jatqany aıtyldy.

Óz kezeginde depýtat Erjan Qudaıbergen árbir gektardyń artynda adam taǵdyry turǵanyn aıtyp, agrotehnıkanyń tártibi saqtalmaı der kezinde sý berilmese, qaı daqyl bolmasyn, kózdegen jetistikke jetý múmkin emes ekenin aıtty. Osy rette depýtattar halyqpen birge vıtse-mınıstrden sharýalardyń talabyn sapaly jáne ýaqytyly oryndaýdy talap etti. Sonymen qatar sý aqysyn tóleýdi qyzmet sapasyna qaraı talap etilý kerek ekenine nazar aýdardy.

Aıta ketý kerek, osy kúnge deıin kóktemgi eginge daıyndyq máselesi depýtattar tarapynan birge birneshe ret kóterilgen bolatyn.