Májilis depýtattary Shahandaǵy apattan japa shekkenderge bir kúndik jalaqylaryn aýdarady
ASTANA. QazAqparat - Májilis depýtattary Qaraǵandy oblysy Shahan kentinde oryn alǵan apattan japa shekkenderge bir kúndik jalaqylaryn aýdaratyn boldy.
Búgin Májilis Tóraǵasy Nurlan Nyǵmatýlınnyń jetekshiligimen ótken Palata Bıýrosynyń otyrysynda osyndaı qaýly qabyldandy, dep habarlaıdy QazAqparat.
Esterińizge sala ketsek, 2017 jyldyń 1 qańtar kúni 22 saǵat 40 mınýttar shamasynda Qaraǵandy oblysynyń Tótenshe jaǵdaılar departamentine Shahan kentinde kópqabatty úıdiń qulaǵany jóninde arnaıy habar kelip túsken. Oqıǵa ornyna tótenshe jaǵdaılar qyzmetiniń kúsh-qurylymdary men arnaıy tehnıkalary jóneltilip, turǵyndardy evakýatsııalaý jumystary júrgizildi.
Qıraǵan úıdiń úıindilerinen 9 adamnyń máıiti tabyldy. Olardyń 3-ýi er adam, 3-ýi áıel adam, taǵy úsheýi balalar. Mert bolǵan otbasynyń árbir múshesine 1 mıllıon teńge materıaldyq kómek kórsetiledi. Aýrýhanada jatqan, zardap shekkender úshin 500 myń teńgeden tólenedi.
Aıta keterligi, Májilis depýtattary Nurlan Dýlatbekov, Gúlnar Bıjanova, Snejanna Imasheva jáne Serik Qusaıynov 5 qańtar kúni Qaraǵandy oblysynyń Shahan kentinde qulaǵan turǵyn úıden qaza tapqandardyń otbasylarymen kezdesedi. Bul týraly QR Parlamentiniń tómengi palata apparatynyń baspasóz qyzmeti habarlady.
