Májilis depýtattary Saıram aýdanynda boldy
SAIRAM. QazAqparat – QR Parlamenti Májilisiniń depýtattary, «Nur Otan» partııasy fraktsııasynyń músheleri Ýálıhan Qaınazarov pen Qudaıbergen Erjan arnaıy issaparmen Saıram aýdanynda boldy. Óńirge jasaǵan jumys sapary barysynda depýtattar aýdan turǵyndarymen kezdesip, birqatar nysandardy aralady, dep habarlaıdy QazAqparat tilshisi.
Halyq qalaýlylary «Nurym Grýpp» jaýapkershiligi shekteýli seriktestiginde bolyp, ondaǵy mal bordaqylaý alańshalaryn aralap kórdi. Seriktestik basshysy Syrym Ertaevtyń aıtýynsha, búgingi tańda mal bordaqylaý alańynda 6000 bas iri qara bar. Munda eki aınalymda 1500 tonna et daıyndalyp, eksportqa shyǵarylady. Bir jyldyq tabysy 3 mlrd teńgeni qurap otyr.
«Bıyl jyl sońyna deıin 10 myń bas iri qara mal jáne keler jyldyń sońyna deıin 20 myń basqa deıin bordaqylanady dep josparlap otyrmyz. Búgingi kúnge deıin 330 tonna qoı eti, 2904 tonna iri qara mal eti eksporttalǵan. Seriktestikte 55 adam turaqty jumyspen qamtylǵan», - deıdi kásipker.
Óz kezeginde depýtattar kásipker tarapynan aıtylǵan usynys pikirlerin tyńdap, sheshimin tabýǵa yqpal etetinin aıtty.
Halyq qalaýlylary munan keıin «AHBK» JShS tigin fabrıkasynyń jumysymen tanysty. Jobalyq quny 1200,0 mln teńgeni quratyn fabrıkada arnaıy forma, áskerı kıimder jáne tósek-oryn ónimderin shyǵarylýda. Onda 110 azamat turaqty jumyspen qamtylǵan. Ónimderdi shyǵarýda tolyq otandyq shıkizattar paıdalanylady.
Sonymen qatar, depýtattar Aqsýkent aýylyndaǵy 500 adam qabyldaıtyn aýdandyq emhana qurylysymen de tanysty. Qazirgi tańda nysan qurylysynyń 85 % aıaqtalyp, ishki árleý jumystary júrgizilýde. Bıylǵy jyly qarasha aıynda eldiń ıgiligine berilmek. Aýdandaǵy emhana qurylys alańyna barǵan depýtattar Aqsýkent aýyly, Q.Jandarbekov atyndaǵy mádenıet úıinde Konstıtýtsııa kúnine arnalǵan merekelik is-sharaǵa qatysyp, jergilikti halyqty merekemen quttyqtady. Májilis depýtattary halyqqa elordada partııa Tóraǵasy N.Á.Nazarbaevtyń Tóraǵalyǵymen ótken «Nur Otan» partııasynyń Saıası keńesi otyrysynyń sheshimderin túsindirdi.
Jıynda Parlament Májilisiniń depýtaty, «Nur Otan» partııasy fraktsııasynyń múshesi Ýalıhan Qaınazarovqa Saıram aýdanynyń ósip órkendeýine qosqan úlesi úshin Saıram aýdanynyń «Qurmetti azamaty» kýáligi tabystaldy.
