Májilis depýtattary saılaý jáne saıası partııalar týraly zańdarǵa qatysty túzetýlerdi talqylady

NUR-SULTAN. QazAqparat - Búgin Májiliste depýtat Snejanna Imasheva bastaǵan jumys toby «Qazaqstan Respýblıkasyndaǵy saılaý týraly» Konstıtýtsııalyq zańǵa jáne «Saıası partııalar týraly» zańǵa engiziletin túzetýlerdi talqylady, dep habarlaıdy QazAqparat tómengi palatanyń baspasóz qyzmetine silteme jasap.

Otyrys beınekonferentsııa formatynda Májilis depýtattary, Ulttyq qoǵamdyq senim keńesiniń músheleri, memlekettik organdar men azamattyq sektor, sondaı-aq «Aýyl» jáne JSDP parlamenttik emes saıası partııalar ókilderiniń qatysýymen ótti.

Zań jobalarymen jumys barysynda depýtattar saıası partııadan depýtattyqqa kandıdattardy usyný, sondaı-aq Májilis pen máslıhattar depýtattyǵyna kandıdattardyń partııalyq tizimderin tirkeýge qatysty birqatar baptardy naqtylady. Osy oraıda zań jobalarynyń negizi bolyp sanalatyn partııalyq saılaý tizimderinde áıelder men jastar úshin keminde 30 paıyz kvotany engizý máselesine basa naza aýdaryldy.

Talqylaý barysynda «Qazaqstannyń áıelderi kúshteriniń alıansy» tóraıymy Raýshan Sarsembaeva, Eýrazııalyq tehnologııalyq ýnıversıtetiniń Adam quqyqtary, ınklıýzııa jáne azamattyq qoǵamdy zertteý ortalyǵynyń dırektory Halıda Ájiǵulova, Eýropalyq quqyq jáne adam quqyqtary saraptamalyq ınstıtýtynyń dırektory Marat Bashımov jáne «Alternatıva» ózekti zertteýler ortalyǵynyń basshysy Andreı Chebotarev óz oılarymen bólisti. Sonymen qatar, «Aýyl» partııasy tóraǵasynyń birinshi orynbasary Tóleýtaı Raqymbekov, Jalpyulttyq sotsıal-demokratııalyq partııasynyń tóraǵasy Ashat Raqymjanov jáne basqa da qatysýshylar pikirlerin bildirdi.

Zań jobasy boıynsha jumys odan ári jalǵasýda.