Májilis depýtattary Respýblıkalyq ulannyń qyzmetimen tanysty
ASTANA. Qazannyń 22-si. QazAqparat. Búgin Respýblıkalyq ulanda Májilistiń Halyqaralyq ister, qorǵanys jáne qaýipsizdik komıtetiniń kóshpeli otyrysy ótti,
dep habarlaıdy QazAqparat.
Otyrysta atalǵan komıtettiń hatshysy Vıktor Rogalev sóz sóılep, Qazaqstan Prezıdentiniń 1992 jylǵy naýryzdyń 16-syndaǵy Jarlyǵymen jasaqtalǵan áskerı qurylymnyń el qaýipsizdigin qorǵaýda alatyn ornyn atap ótti.
Respýblıkalyq ulannyń qolbasshysy, general-leıtenant Abaı Tasbolatov komıtet múshelerine on jeti jyldan beri atqaryp kele jatqan isterimen tanystyryp, beıne kórinis kórsetti.
Respýblıkalyq ulan qurylǵan kúninen bastap jaýyngerlik ázirlikke, komandırlik jáne jaýyngerlik daıarlyqqa, tárbıe men áleýmettik-quqyq jumysynyń sapasyna, qarýlaný, tehnıkamen jaraqtalý jáne tyl isterine erekshe kóńil aýdarady. Ol soǵys jáne tótenshe jaǵdaı týa qalǵanda Qazaqstan zańnamasyna sáıkes áreket etý úshin joǵary jaýyngerlik jáne shuǵyl-qyzmettik ázirlik jaǵdaıynda bolýǵa múmkindik týǵyzady. Kún saıyn 119 jaýynger qyzmettik kúzette turady.
2001 jyldan beri Respýblıkalyq ulan Prezıdenttiń kúzet qyzmetimen, Qorǵanys mınıstrligimen, Ulttyq qaýipsizdik komıtetimen, Іshki ister, Tótenshe jaǵdaılar jónindegi mınıstrlikterimen birlesip ister atqarýda.
Qoıan-qoltyq shaıqastan Respýblıkalyq Ulan Qolbasshysynyń kýbogy jolyndaǵy halyqaralyq jeke-komandalyq týrnır jyl saıyn ótkizilip turady. Atalǵan sport túrinen bıyl toǵyz el qatysqan Azııalyq oıyndar jarysy ótkizilip, Qazaqstan komandasy bas júldege ıe bolǵan. Voleıboldan ótkiziletin týrnırde de jetistikterge jetip keledi.
Áleýmettik qamtamasyz etýge de basa nazar aýdarylyp otyr. 2006 jyly áskerı qyzmetkerlerge 120 páterlik úı berilgen, 2008 jyly 72 páterlik úı Almatydan, 60 páterlik úı Astanadan tapsyrylǵan. Osylarǵa qosymsha jas otbasylyq jataqhana da berildi. Ótken jyldan áskerı ataqtary men biliktilikteri úshin aılyqtaryna qosymsha qosyla bastady.
Ulandyqtar elimizdegi patrıottyq tárbıege erekshe úles qosyp keledi. Qazaqstannyń atyn alysqa da shyǵaryp otyr. Bıylǵy qyrkúıektiń 5-inde Respýblıkalyq ulannyń qurmet qaraýyly rotasy men Prezıdenttik úrlemeli aspaptar orkestri Máskeýde ótken «Spassk munarasy» atty halyqaralyq áskerı-mýzykalyq festıvalge qatysyp, Kreml alańynda kórermender rızashylyǵyna bólendi.
Respýblıkalyq ulan shet memleketterdiń ózderi sııaqty qurylymdarymen, Reseıdiń Prezıdent polkimen, Tájikstan men Qyrǵyzstannyń Ulttyq gvardııalarymen áriptestik qarym-qatynasta.
Respýblıkalyq ulannyń osyndaı atqaryp otyrǵan isterimen tanysqan komıtet músheleri olarǵa Otan qorǵaý jolyndaǵy atqaryp otyrǵan jaýapty isterine tabys tiledi.
