Májilis depýtattary Reseıde qus tumaýynyń taralýyna alańdaýly
ASTANA. QazAqparat - Qazaqstanda qus tumaýyna qarsy sharalar jetkiliksiz deńgeıde. Búgin Májilistiń jalpy otyrysynda bir top depýtattyń atynan QR Premer-Mınıstri Baqytjan Saǵyntaevtyń atyna joldaǵan saýalynda Sergeı Zvolskıı osylaı málim etti, dep habarlaıdy QazAqparat.
«Aǵymdaǵy jyldyń qańtarynda Májilistiń 10 depýtaty Sizdiń atyńyzǵa álemde qus tumaýynyń taralýy máselesine qatysty saýal joldaǵan bolatynbyz. Sonymen birge qańtardan keıin ahýal ýshyǵa tústi. Atap aıtqanda, 30-dan astam memleket Dúnıejúzilik janýarlar densaýlyǵyn saqtaý uıymyna qus tumaýynyń taralýyna baılanysty málimetterdi baǵyttady»,-dep toqtaldy Zvolskıı.
Onyń sózine qaraǵanda, Reseı aýmaǵynda qus tumaýynyń birqatar faktilerine baılanysty Qazaqstandaǵy qus ósirý salasyna qatysty qaýip alańdaýshylyq týdyrady. Búginde RF tarapy atalǵan indetke qarsy vaktsınany satyp alý turǵysynda shuǵyl sheshim qabyldaǵan eken.
Depýtattyń paıymynsha, Qazaqstandaǵy qabyldanyp jatqan sharalar atalǵan indetten keletin negizgi qaterlerdi qamtı almaýy múmkin.
Osy oraıda depýtattar «Veterınarııa boıynsha ulttyq referenttik ortalyq» RMK-de qus tumaýynan vaktsınany óndirýdi keńeıtý sharalaryna dereý kirisý kerektigin, sondaı-aq bul ortalyqty QR Bilim jáne ǵylym mınıstrliginen QR Aýyl sharýashylyǵy mınıstrligine berý máselesin sheshý qajettigin alǵa tartty.
Olardyń pikirinshe, bıýdjet qoryndaǵy qarjyny tartý arqyly iri qus ósiretin sharýashylyqtardaǵy, kooperatıvterdegi qustardy vaktsınalaý jumystary qamtylýy kerek.
Sonymen qatar aýyl sharýashylyǵy janýarlary men qustaryn bıologııalyq qorǵaý baǵytynda atalǵan RMK bazasynda túrli qaýipti dertterge qarsy vaktsınanyń jappaı óndirisin uıymdastyrý usynyldy.
