Májilis depýtattary poıyz bıletteriniń alypsatarlyǵyna qatysty jaýapkershilikti qataıtýdy talap etýde
ASTANA. 4 naýryz. QazAqparat - Májilis depýtattary poıyz bıletteriniń alypsatarlyǵyna qatysty jaýapkershilikti qataıtýdy talap etýde. Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy talqylanǵan dóńgelek ústel barysynda málim boldy.
Kólik jáne kommýnıkatsııa mınıstrliginiń Jaýapty hatshysy Jeńis Qasymbektiń aıtýynsha, jalpy qaýipsizdik máselelerine baılanysty depýtattardyń bastamalarymen birqatar máseleler zań jobasynda qamtylyp otyr. Atap aıtqanda, temirjol kóliginde júk tasymalyn lıtsenzııalaý týraly bastama Úkimet janyndaǵy vedomstvoaralyq komıssııanyń maquldaýynan ótken. «Zań jobasymen múgedekterge, múmkindigi shekteýli adamdarǵa qatysty qyzmetter kórsetý, onyń ishinde arnaıy qondyrǵylar paıdalaný men túrli tablolar, Braıl álipbıin paıdalaný sekildi qyzmetter boıynsha vokzal ıeleriniń jaýapkershiligi naqtylanady», - deıdi jaýapty hatshy.
Budan bólek, jolaýshylar tasymalyna qatysty servıstik qyzmetter boıynsha qalyptasqan jaǵdaıǵa nazar aýdara kele, J. Qasymbek depýtattardyń bılet satylymyna qatysty usynǵan bastamalaryna toqtaldy. «Depýtattar negizinen bılet satylymdarynyń balama joldaryn damyta otyryp, ony uıymdastyrýdy reglamentteýdi, sondaı-aq bıletterdi satyp alyp qaıta satýmen aınalysatyn tulǵalarǵa jaýapkershilikti qataıtýdy usynyp otyr», - deıdi ol.
