Májilis depýtattary Petropavldaǵy oftalmologııalyq ortalyqtyń jumysymen tanysty
PETROPAVL. QazAqparat - QR Parlamenti Májilisiniń depýtattary Petropavldaǵy oftalmologııalyq dıagnostıkalyq ortalyqtyń jumysymen tanysty, dep habarlaıdy QazAqparat tilshisi.
SQO-ǵa jumys saparymen kelgen QR Parlament Májilisiniń depýtattary Elbasynyń «Nur Otan» partııasynyń 18-shi sezinde bergen tapsyrmalarynyń oryndalý barysymen tanysyp, óńirdiń áleýmettik nysandaryn aralady.
Depýtattar Petropavldaǵy oftalmologııalyq dıagnostıkalyq ortalyǵynda bolyp, dárigerlermen kezdesti. Nysan 4 aı buryn memlekettik jekemenshik áriptestigi aıasynda salyndy. Onyń qurylysyna 550 mln teńgeden astam ınvestıtsııa quıyldy. Oftalmologııalyq ortalyq tolyqtaı zamanaýı qurylǵylarmen jabdyqtalǵan. 35 jatyn orynǵa shaqtalǵan klınıka jylyna 4900 adamdy qabyldaýǵa qaýqarly. Ortalyqta naýqastar táýlik boıy emdeý alyp, olarǵa ota, lazerlik ota jáne dıagnostıka jasalady, sonymen qatar kúndizgi statsıonar men jedel járdem qyzmeti de qarastyrylǵan.
Oblys ortalyǵyndaǵy zamanaýı emdeý mekemesine qazir petropavldyqtar ǵana emes, shalǵaı aýyldardaǵy turǵyndar da kelip em dom alýda. Olar úshin arnaıy jatyn oryndar bar. Depýtattar ınvestorlardyń bul bastamalaryn qoldap, turǵyndardyń densaýlyǵyn jaqsartýdaǵy úlesin joǵary baǵalady. 
«Bul emdeý mekemesiniń bolashaǵy zor. 15 jyldan keıin memleketke qaıtarylady. Investorlardyń ózi jergilikti azamattar, patrıot azamattar. Halyqtyń densaýlyǵyn oılap júrgen. Alǵa qoıǵan josparlary óte jaqsy. Aldaǵy ýaqytta ortalyqta kórsetiletin qyzmet túrlerin keńeıtpekshi», - deıdi QR Parlamenti Májilisiniń depýtaty Káribaı Musyrman.
Emdeý mekemesinde 6 oftalmolog dáriger eńbek etedi, olardyń ortasha eńbekaqylary 300 myń teńge shamasynda.
