Májilis depýtattary Pavlodar óńirinde energetıka máselelerin zerdeleýde
ASTANA. Sáýirdiń 16-sy. QazAqparat - Búgin QR Parlamenti Májilisiniń Ekologııa máseleleri jáne tabıǵat paıdalaný komıtetiniń keńeıtilgen kóshpeli otyrysy sheńberindegi Pavlodar oblysyndaǵy jumys sapary odan ári jalǵasty,
dep habarlaıdy QazAqparat.
Erlan Nyǵmatýlın jetekshilik etetin komıtet músheleri birqatar ónerkásip keshenderi men áleýmettik nysandarda boldy. Atap aıtqanda, ENRC toby quramyna enetin «Eýrazııalyq energetıkalyq korporatsııasy» AQ, «Qazaqstandyq elektrolız zaýyty» AQ jáne «Qazaqstan alıýmınıi» AQ óndiris oryndarynyń qyzmetimen tanysty. Sonymen qatar ENRC-tiń turǵyn úı baǵdarlamasyna sáıkes salynyp jatqan turǵyn úılerdi kórdi, balabaqsha men Pavlodar alıýmınıı zaýytynyń medıtsınalyq ortalyǵynda boldy. Sondaı-aq depýtattar Aqsý qalasyna baryp, Aqsý jylý-elektr ortalyǵynyń ekinshi energoblogyn jóndeý jumystarymen tanysty jáne Eýrazııalyq energetıkalyq korporatsııasynyń balyq sharýashylyǵynda boldy.
Bul sapardyń maqsaty - Pavlodar oblysyndaǵy energııa tutynýshy kásiporyndar mysalynda energetıkany jáne energııa únemdeýshi tehnologııalardy damytý perspektıvalaryn zerdeleý. Sondaı-aq jer qoınaýyn paıdalaný salasynyń Qazaqstan Prezıdenti Nursultan Nazarbaevtyń bıylǵy «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty halyqqa arnaǵan Joldaýynyń erejelerin iske asyrýǵa daıarlyǵyn baǵdarlaý maqsaty kózdelip otyr.
Komıtettiń kóshpeli otyrysyna Parlament Májilisiniń depýtattary, Qorshaǵan ortany qorǵaý, Indýstııa jáne jańa tehnologııalar, Eńbek jáne halyqty áleýmettik qorǵaý mınıstrleriniń orynbasarlary, Ekonomıkalyq damý jáne saýda mınıstrligine qarasty departament dırektory, Pavlodar oblysynyń ákimi Baqytjan Saǵyntaev, sondaı-aq ENRC kompanııasynyń ókilderi qatysýda.
Sol sekildi osy sharalarǵa Qazaqstannyń taýar óndirýshileri jáne sarapshylary odaǵynyń, respýblıkalyq taý-ken óndirý jáne taý-ken metallýrgııalyq kásiporyndary qaýymdastyǵynyń, taý-ken metallýrgııalyq ónerkásibi jumysshylary kásipodaǵynyń ókilderi qatysý ústinde.
Kóshpeli otyrys Parlament Májilisiniń tórtinshi shaqyrylymynyń úshinshi sessııasyna arnalǵan negizgi josparyna sáıkes júzege asyp otyr.
