Májilis depýtattary Pavlodar oblysynyń Tereńkól aýdanyna bardy
ASTANA. QazAqparat - Búgin Májilis depýtattary Gúljan Qaraǵusova, Vasılıı Oleınık, Aleksandr Sýslov, Tatıana ıAkovleva jáne Sergeı Sımonov jumys saparymen Pavlodar oblysynyń Tereńkól aýdanynda boldy, dep habarlaıdy QazAqparat Májilistiń baspasóz qyzmetine silteme jasap.
Sapar barysynda depýtattar sý tazartý qurylystarynyń jańǵyrtýy men qaıta jóndeý jumystary aıaqtalǵan «Bastaý» kásipornyna bardy.
Atalǵan uıymnyń dırektory Ashat Zarıpov 1976 jyldan beri kásiporynǵa jóndeý jumystary júrgizilmegenin aıtty. Eskirgen qural-jabdyqtardyń saldarynan turǵyndardy qajetti taza aýyz sýmen qamtamasyz ete almaǵandyqtan, jazda aýyz sý aýyl turǵyndaryna keste boıynsha berilgen.
Ótken jyldyń jeltoqsan aıynda jóndeý jumystary aıaqtalyp, búginde eldimeken taza aýyz sýdy tutynyp otyr.
Májilisi depýtaty Gúljan Qaraǵusova quny 900 mln teńgeden asatyn joba barlyq standarttar men sanıtarlyq normalarǵa saı bolýy tıis, dedi.
Sonymen qatar, kásiporyn jumysshylarymen kezdesý barysynda májilismender árbir azamattyń usynys-tilekterlerin tyńdaýǵa daıyn ekendikterin, olardyń pikirleri eskerýsiz qalmaıtynyn aıtyp, árdaıym ashyq ekendikterin jetkizdi.
Sondaı-aq depýtattar Tereńkól aýdanynyń partııa fılıalynyń konferentsııasyna qatysyp, «Master» saýda ortalyǵyna baryp, jergilikti bıýdjet máselesin talqylady.
