Májilis depýtattary Parlament kitaphanasyndaǵy «Ashyq esik» sharasyna qatysty
ASTANA. QazAqparat - Búgin Qazaqstan Respýblıkasy Parlamenti Májilisiniń altynshy shaqyrylym depýtattary vıtse-spıker Vladımır Bojkonyń basshylyǵymen Májilistegi kitaphanada bastalǵan «Ashyq esik» kúni sharasyna qatysty. Halyq qalaýlylaryn palata Apparatynyń Aqparat-taldaý bóliminiń meńgerýshisi Janna Qurmanǵalıeva men sektor meńgerýshisi Qanat Qudaıbergenov aqparattyq qorlarmen jáne kórmelermen tanystyrdy. Bul týraly Májilistiń baspasóz qyzmetinen habarlandy.
«Álemde kóptegen elderdiń Parlamentteriniń janynan Ulttyq kitaphanalar jasaqtalǵan. Al Qazaqstan Parlamentiniń kitaphanasy Qazaq KSR Joǵarǵy Keńesiniń Aqparattyq-taldaý ortalyǵynyń quramdas bóligi retinde 1987 jyly quryldy. Onyń jalpy kitap qorynda 46 myńnan astam baspa ónimderi, onyń ishinde 26 myń kitap jáne 227 merzimdi basylym bar. Kitaphana jumysynda dástúrli ádisimen birge ártúrli jańa aqparattyq tehnologııalar keńinen qoldanylady», - delingen baspasóz baıanynda.
Parlament kitaphanasy qos palatanyń zań shyǵarý qyzmetin qamtamasyz etý máselelerine, talqylanatyn zań jobalaryna, parlamenttik tyńdaýlarǵa jáne Parlament ótkizetin sharalarǵa bıblıografııalyq jáne anyqtamalyq-aqparattyq materıaldar daıyndaýǵa erekshe kóńil bóledi. Parlament Palatalarynyń komıtetterimen jáne apparattarynyń bólimderimen tyǵyz yntymaqtastyqta jumys jasaıdy.
«Ortalyqtyń negizgi mindeti eldegi joǵarǵy ókildi organnyń qyzmetin aqparattyq-anyqtamalyq, taldamalyq jəne kitaphanalyq-bıblıografııalyq jaǵynan qamtamasyz etý bolyp tabylady. Parlament kitaphanasy Qazaqstannyń kóptegen kitaphanalarymen jəne ózge de memlekettik aqparattyq qurylymdarmen tyǵyz baılanys ornatqan. Kitaphana halyqaralyq aqparat almasý sheńberinde Reseı Federatsııasy Memlekettik Dýmasynyń Parlamenttik kitaphanasymen, Reseı Ǵylym Akademııasynyń Memleket jəne quqyq ınstıtýtymen, Reseı Úkimeti janyndaǵy Zańnama jəne salystyrmaly quqyqtaný ınstıtýtymen yntymaqtasyp otyr. Sondaı-aq Parlamenttik kitaphana TMD-nyń birqatar elderiniń áriptesterimen de iskerlik baılanys ornatqan», - delingen baspasóz baıanynda.
