Májilis depýtattary óskeleń urpaqty zııandy aqparattan qorǵaýǵa múddeli
ASTANA. 5 qyrkúıek. QazAqparat - Jahandyq damý kezinde jas urpaqty zııandy aqparattan qorǵaý qajet. Osy maqsatta ázirlengen zań jobasy búgin Májilistiń Áleýmettik-mádenı damý komıtetiniń jumys toby otyrysynda talqyǵa salyndy.
Aıta ketý kerek, «Balalardy densaýlyǵyna jáne damýyna zardabyn tıgizetin aqparattan qorǵaý týraly» zań jobasyna Májilis depýtattary Aldan Smaıyl, Gúlnár Seıitmaǵanbetova, Svetlana Bychkova, Gúlmıra Isimbaev bastamashylyq jasaǵan.
Osy zań jobasy balalardyń óz jasyna sáıkes keletin aqparatty alý men taratý quqyǵyn iske asyrýǵa baılanysty týyndaıtyn qoǵamdyq qatynastardy retteýge jáne balalardy olardyń densaýlyǵy men damýyna zardabyn tıgizetinaqparattan qorǵaýǵa baǵyttalǵan.
Zań jobasy bastamashylarynyń biri, jumys tobynyń jetekshisi, Májilis depýtaty Aldan Smaıyl zań jobasynyń ótken sessııadaǵy jumys toby otyrystynda kóptegen baptar boıynsha talqylanǵanyn, búgin jańa sessııadaǵy alǵashqy otyrysta talqylaýǵa shyǵarylǵan keıbir baptardyń qaralatynyn aıta kelip: «Baspasózge qatysty bir top qoǵamdyq uıymdardyń ókilderi óz usynystaryn berdi. Onyń bári ortaq salystyrma kestege engizildi. Jań túzetýler boıynsha ortaq sheshimge kelýimiz kerek»,- dedi.
Talqylaýǵa qatysqan jumys tobynyń músheleri Ulasbek Sádibekov, Gúlnár Seıitmaǵanbetova, Gúlnár Yqsanova, Gúlmıra Isimbaeva, Zýhra Saıapova, Quralaı Qareken, Orazgúl Asanǵazy, Nadejda Nesterova keıbir baptar boıynsha óz pikirlerin ortaǵa saldy. QR Mádenıet jáne aqparat, QR Bilim jáne ǵylym mınıstriliginiń ókilderi depýtattardyń keıbir suraqtary boıynsha jaýap berdi.
