Májilis depýtattary Oralda kókeıkesti máselelerdi talqylady
ORAL. QazAqparat - Búgin Oral qalasyndaǵy Dostyq úıinde QR Parlamenti Májilisi ekonomıkalyq reforma jáne óńirlik damý komıtetiniń sáýlet-qurylys qyzmeti salasyndaǵy baqylaý jáne qadaǵalaý júıesin jetildirý men sýmen jabdyqtaý máseleleri boıynsha kóshpeli otyrysy ótkizildi. Onda qurylys salasyna qatysty zańnamalyq aktilerdi jetildirý, soǵan baılanysty ákimshilik kedergilerdiń týyndaýy, qurylys sapasy tómendep, ýaqtyly tapsyrylmaýy jáne memlekettik portal arqyly qujat rásimdeýdegi túıtkilder syndy kókeıkesti máseleler talqylandy, dep habarlaıdy «QazAqparat» tilshisi.
Atalǵan komıtet tóraǵasy Nurtaı Sabılıanovtyń atap ótkenindeı, Batys Qazaqstan oblysy úshin turǵyndardy aýyz sýmen qamtý jáne avtojoldardy jóndeý ózekti bolyp otyr. Mysaly, óńirdegi 319 672 turǵyny bar 443 eldi mekenniń 164-i nemese 37 paıyzy ǵana taza sýdy tutynady. 275-i ortalyqtandyrylǵan sý júıesine qosylmaǵan. Tórt aýyl aýyz sýdy syrttan tasymaldaıdy. Sondyqtan bul máseleni sheshý maqsatynda oblystyń barlyq aýdanynda bıyl 39 sýmen qamtý nysanyn salý nemese qaıta qurý kózdelýde. Osy jobalardy júzege asyrýǵa 7 mlrd teńge bólingen. Bul 65 myńnan astam turǵyny bar 54 eldi mekendi sapaly sýmen qamtýǵa múmkindik beredi. Respýblıkalyq jáne jergilikti mańyzy bar joldardy jóndeýge de qomaqty qarjy qaralyp otyr.
Kóshpeli otyrysta sondaı-aq Májilis depýtaty Baqtııar Máken «100 naqty qadam» Ult josparynyń 46-49 qadamdaryna toqtalsa, QR Investıtsııalar jáne damý vıtse-mınıstri Roman Sklıar sáýlet jáne qala qurylysy salasyna qatysty reformalar jóninde baıandap berdi.
«Qazirgi tańda óńirde aýyz sýmen jabdyqtaý jumystary qarqyndy júrgizilýde. Buǵan sapar barysynda Terekti jáne Bórli aýdandarynda bolǵanymyzda kóz jetkizdik. Sol sekildi avtojoldardy salý jáne kúrdeli jóndeý máselesi Májilis otyrysynda kóterilip, jıi sóz bólip keledi. Bólingen qarjynyń durys jumsalýyn, qurylystyń sapaly salynýyn qadaǵalaý da kerek. Ekinshiden, kóshpeli otyrysta, sondaı-aq aýdandarda sharýa qojalyqtarynyń basshylarymen, kásipkerlermen kezdesýlerde kóptegen usynys-pikirler aıtyldy. Munyń bárin jınaqtap, saralap, sodan keıin Májilis otyrysynda qarap, tıisti sheshim qabyldaıtyn bolamyz», - dedi Nurtaı Sabılıanov.
Májilis depýtattary jumys sapary barysynda Oral qalasyna qarasty Zachagan kentinde salynyp jatqan jańa mektep pen turǵyn úılerdiń qurylysymen tanysty.
Aıta keteıik, óńirde «Nurly jer» baǵdarlamasyna sáıkes bıyl 12 633,265 mln teńge qaralsa, sonyń ishinde 10 642,112 mln. teńge 10 kóp qabatty jáne aýyldardaǵy 183 turǵyn úıdi salýǵa, sondaı-aq 1 991,153 mln teńge 15 ınjenerlik-kommýnıkatsııalyq ınfraqurylym nysanyn tartýǵa berilip otyr.
