Májilis depýtattary óńir turǵyndaryna qatysty myńnan astam problemany Úkimettiń qaraýyna usyndy
Aıta keteıik, búgin jalpy otyrysta Májilis depýtattarynyń óńirlerge sapary barysynda turǵyndardan kelip túsken ótinishterdi qaraý nátıjeleri boıynsha Úkimettiń aqparaty tyńdaldy.
Osy oraıda Premer-Mınıstrdiń orynbasary Eraly Toǵjanov bastaǵan birqatar Úkimet músheleri arnaıy keldi.
Otyrysta Májilis tóraǵasy Erlan Qoshanov Memleket basshysy depýtattardyń óńirlerdegi ózekti áleýmettik máselelerdi sheshýge atsalysýyn kúsheıtý jóninde tapsyrma bergenin atap ótti.
– Depýtattar aqpan aıynda elimizdiń barlyq óńirine baryp, saılaýshylarmen mazmundy kezdesýler ótkizdi. Onda turǵyndar tarapynan birqatar problemalar kóterilip, ótinishter qabyldandy. Sonyń bárin jınaqtap, bir aı buryn Úkimetke joldaǵan bolatynbyz. Mine, búgin osy máselelerdiń sheshilýi týraly Úkimettiń aqparatyn tyńdaıyn dep otyrmyz, - dedi Erlan Qoshanov.
Depýtattar elimizdiń barlyq óńirine baryp, saılaýshylarmen 1600-ge jýyq kezdesý ótkizdi. Olar túrli áleýmettik nysandarda, kásiporyndar men bazarlarda, shalǵaı eldi mekenderde bolyp, eńbek ujymdarynyń problemalarymen tanysty. Barlyǵy myńnan astam másele jınaqtalyp, Úkimetke jiberildi. Sonyń ishinde azyq-túlik pen dári-dármektiń qymbattaýy, aýyz sýmen jáne turǵyn úımen qamtamasyz etý, mektep qurylysy, jol jóndeý, ınternet sapasyn jaqsartý máseleleri bar.
Májilis tóraǵasynyń aıtýynsha, problemalardyń bári naqty ári júıeli túrde sheshilýge tıis. Olar depýtattardyń jiti baqylaýynda bolady.
«Árbir máseleniń artynda adamdardyń turmysy men taǵdyry tur. Osyny ár depýtat, mınıstr men jergilikti bılik ókilderi tereń túsinýge tıis. Qazir elimiz úlken ózgeristerdiń aldynda tur. Prezıdent iri saıası reformalar jarııalady. Ol reformalar qarqyndy júzege asa bastady. Al biz – Parlament, Úkimet, jergilikti bılik, bárimiz bir kisideı jumylyp, qoǵamda qordalanǵan máselelerdi sheshýde jedel áreket etýimiz qajet. Bir sózben aıtqanda biz Memleket basshysynyń qarqynyna ilese bilýimiz kerek, – dedi Erlan Qoshanov.
Sondaı-aq Palata spıkeri Parlament pen Úkimettiń máselelerdi sheshý boıynsha jańa formattaǵy jumysy aldaǵy ýaqytta da júıeli túrde jalǵasatynyn aıtty.
