Májilis depýtattary metall balqytý tsehynda boldy - Aqtóbe oblysy
AQTÓBE. QazAqparat - Elbasy Nursultan Nazarbaevtyń Joldaýyn jumysshylarǵa túsindirý maqsatynda Májilis depýtattary Aqtóbe ferroqorytpa zaýytynyń №4 tsehyna bardy. Zamanaýı úlgidegi jańa tseh jumysymen tanysqan depýtattar metall balqytý protsesin tamashalap, Anton Platonov balqytýshylardyń arnaıy kıimin kıip kórdi, dep habarlaıdy QazAqparat tilshisi.
Memleket basshysy Nursultan Nazarbaevtyń Úndeýi men Joldaýyn halyqqa túsindirý maqsatynda Aqtóbege kelgen depýtattar aýdan, aýyldy aralap, búgin óndiris ornynyń jumysymen tanysty. Aqtóbe ferroqorytpa zaýytynyń №4 tsehy 2014 jyly Elbasynyń qatysýymen iske qosylǵan bolatyn. Álemde teńdesi joq óndiris ornynda jumys turaqty júrip tur. Májilis depýtattary Amanjan Jamalov, Saparhan Omarov, Gleb Şegelskıı, Anton Platonov pen Danııa Espaeva barlaý, paıdaly qazbalardy óndirý, baıytý satysynan turatyn keshendegi jumyspen tanysty.
«Jańa tseh iske qosylǵanda ónim óndirý kólemi artyp, kenniń ózindik quny tómendedi. Eski zaýytta 7 pesh jumys istep, 300 myń tonna daıyn ónim shyǵarylsa, jańa óndiris ornyndaǵy 4 peshte 440 myń tonna ónim alyndy. Ótken jyly jańa tsehta 100 myń tonna hrom óndirilse, bıyl eki ese arttyryp, 300 myń tonnaǵa jetkizýdi josparlap otyrmyz»,- «QazHrom» TUK» AQ Aqtóbe ferroqorytpa zaýytynyń dırektory Murat Mýkashev.
Memleket basshysy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» atty Joldaýynda óndiris oryndaryna ınnovatsııalyq tehnologııany engizý tapsyrmasyn júktegen bolatyn. Aqtóbedegi ferroqorytpa tsehy bul mindetti oryndap, álemde teńdesi joq ádispen jumys istep jatyr.
«Qarjynyń tıimdi josparlanyp, jumsalǵany kórinip tur. Zaýytta myńdaǵan adam jumys isteıdi, bastysy zamanaýı tehnologııamen qamtamasyz etilgen. Sheteldik mamandar jergilikti jumysshylardy oqytyp, dáris beredi. Taıaý ýaqytta jumysshylarymyz bar júkti óz mindetterine alady. Qazir basty básekelesimiz Ońtústik Afrıka eli. Al hrom keniniń qory jaǵynan álem boıynsha Qazaqstan birinshi orynda tur. Bul zaýyt bolashaǵynyń zor ekenin kórsetedi»,- dedi Májilis depýtaty Anton Platonov.
Májilis depýtattary óndiris ornymen tanysyp, jumysshylarmen kezdesken soń zaýyttaǵy jańa tehnologııa Elbasy Joldaýyndaǵy barlyq tapsyrmanyń kúni buryn oryndalýyna múmkindik bergenin aıtty. 
«Elbasy Joldaý jumysshy jastardyń kóńilinen shyqty. Máselen, «Nurly jer» baǵdarlamasy arqyly 15 jylda 1,5 mıllıon otbasyny turǵyn úımen qamtamasyz etý tapsyrmasyn júktedi. Bul úısiz júrgen jastardyń baspanaly bolýyna septigin tıgizetin basymdyq. Sonymen qatar, tegin tehnıkalyq-kásiptik bilim berý eldegi jumyssyzdyq sanyn azaıtyp, kásibı mamandardyń qataryn arttyrýǵa múmkindik beredi»,- dedi Aqtóbe ferroqorytpa zaýytyndaǵy №1balqytý tsehynyń balqytýshysy Ǵanıbek Esenjolov.
