Májilis depýtattary memleket jáne qoǵam qaıratkeri Ó. Jánibekovtiń mereıtoıy qarsańynda birqatar sharalardy júzege asyrý qajet dep esepteıdi
ASTANA. Qazannyń 28-i. QazAqparat - Májilis depýtattary memleket jáne qoǵam qaıratkeri Ózbekáli Jánibekovtiń mereıtoıy qarsańynda birqatar sharalardy júzege asyrý qajet dep esepteıdi. Osy oraıda Parlament Májilisiniń depýtaty Ýálıhan Qalıjanov QR Premer-Mınıstri Kárim Másimov myrzanyń atyna depýtattyq saýal joldady.
Depýtat saýalyn qoldap, áriptesteri K. Saǵadıev, G. Qaraqusova, D. Nóketaeva, A. Smaıyl, N. Ónerbaı, J. Súleımenov, B. Tileýhan qol qoıǵan.
Qazaqtyń noqtaǵa basy syımaǵan uldary barshylyq. Solardyń ishinde halyq Ózekeń dep ardaqtap ketken Ózbekáli Jánibekov te bar. Kezinde Qazaqstannyń halyq jazýshysy, kúni keshe Qazaqstannyń Eńbek Eri ataǵyn alǵan Ábish Kekilbaı myrza: «Nesin aıtasyz, japan túzge jeke bitken kók seńgirdeı dara tulǵa edi. Ótip bara jatqan ǵasyrda qazaqqa talaı-talaı múıizi qaraǵaıdaı ul syılaǵan jomart Qudaıdyń bir berdim dep bergen eren perzenti edi» dep baǵalap, ári rýh sardary dep atap edi.
Al Sherhan Murtaza «Onyń, ıaǵnı Ózbekáli Jánibekovtiń halqyna sińirgen erekshe eńbegin tizbelep shyǵý úshin ǵana úlken kitap jazý kerek. Ol - kıeli adam» deıdi.
«Qadirli Kárim Qajymqanuly!2011 jyly iri qoǵam jáne memleket qaıratkeri Ózbekáli Jánibekov 80 jasqa tolǵaly otyr. Osyǵan oraı birqatar is-sharalardy uıymdastarýǵa qol ushyn berýdi suraımyn»,- deıdi depýtat Ý.Qalıjanov.
