Májilis depýtattary mádenı murany qorǵaý týraly konventsııany bekitti
ASTANA. 9 qarasha. QazAqparat - Búgin QR Parlamenti Májilisiniń Tóraǵasy Oral Muhamedjanovtyń jetekshilik etýimen ótken Palatanyń jalpy otyrysynda «Materıaldyq emes mádenı murany qorǵaý týraly konventsııany ratıfıkatsııalaý týraly» zań jobasy maquldandy,
dep habarlaıdy Májilistiń baspasóz qyzmeti.
QR Mádenıet mınıstri Muhtar Qul-Muhammed baıandama jasap, atalǵan konventsııanyń maqsaty jóninde aıtyp, depýtattardyń birqatar suraqtaryna jaýap qaıtardy. Halyqaralyq ister, qorǵanys jáne qaýipsizdik komıtetiniń múshesi Baǵıla Baımaǵambetova qosymsha baıandama jasady. Aıta ketý kerek,Materıaldyq emes mádenı murany qorǵaý týraly konventsııa 2003 jylǵy 17 qazanda Parıjde qabyldanǵan.
Baıandamashynyń aıtýynsha, osy Konventsııanyń maqsaty materıaldyq emes mádenı murany qorǵaý, tıisti qoǵamdastyqtardyń, toptardyń jáne jekelegen adamdardyń materıaldyq emes mádenı murasyn qurmetteý, materıaldyq emes mádenı muranyń jáne ony ózara tanýdyń mańyzdylyǵyna jergilikti, ulttyq jáne halyqaralyq deńgeılerde nazar aýdarý bolyp tabylady.
Materıaldyq emes mádenı mura qoǵamdastyqtar, toptar jáne keıbir jaǵdaılarda jekelegen adamdar ózderiniń mádenı murasynyń bir bóligi retinde tanyǵan ádet-ǵuryptardy, túsinikteri men paıymdarynyń nysandaryn, bilim men daǵdyny, sondaı-aq olarmen baılanysty quraldardy, zattardy, artefaktilerdi jáne mádenı keńistiktikti bildiredi. Osy Konventsııanyń maqsattary úshin adam quqyqtary jónindegi qoldanystaǵy halyqaralyq-quqyqtyq aktilermen jáne qoǵamdastyqtar, toptar men jekelegen adamdar arasyndaǵy ózara qurmet talaptarymen sáıkes keletin materıaldyq emes mádenı mura ǵana nazarǵa alynady.
Konventsııaǵa sáıkes árbir qatysýshy memleket óziniń aýmaǵynda bar materıaldyq emes mádenı murany qorǵaýdy, damytýdy jáne onyń rólin arttyrýdy qamtamasyz etý úshin qoǵamda materıaldyq emes mádenı muranyń rólin arttyrýǵa jáne osy murany qorǵaýdy josparlaý baǵdarlamasyna kirgizýge baǵyttalǵan jalpy saıasatty qabyldaý, onyń aýmaǵynda bar materıaldyq emes mádenı murany qorǵaý jóninde bir nemese birneshe quzyretti organdardy belgileý nemese qurý, ǵylymı, tehnıkalyq jáne ónertaný zertteýlerine járdemdesý, tıisti zańdyq, tehnıkalyq, ákimshilik jáne qarjylyq sharalardy qabyldaý maqsatynda kúsh-jigerin jumsaıdy.
Májilis depýtattary zań jobasyn qarap, maquldady.
