Májilis depýtattary M. Áshimbaev pen G. Qaraǵusova saılaýshylarmen kezdesti

Júzdesý barysynda depýtattar birinshi sessııanyń qorytyndylary týraly baıandap, Memleket basshysynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty baǵdarlamalyq maqalasynda kóterilgen máseleler talqyǵa tústi.

«Saılaýshylarmen kezdesý negizgi úsh maqsattan turady. Birinshiden, Astana saılaýshylarynyń aldynda zań shyǵarýshy organnyń jumysyn qorytyndylap, birinshe sessııada qandaı zańnamalar qabyldanǵanyna toqtamaqshymyz. Osy jaıynda keńinen aqparat beremiz. Ekinshiden, Astana halqyn tolǵandyratyn problemalarǵa keńinen qanyqqymyz keledi. Ondaı aqparattar bolsa biz ony ózimizdiń aldaǵy zań shyǵarmashylyǵymyzdaǵy jumysta eskeretin bolamyz. Úshinshiden, ótken aıda baspasózde Elbasynyń úlken maqalasy jarııalanyp, onda elimizdiń áleýmettik jańǵyrtylýyna, ony jańa deńgeıge kóterýge qatysty maqsattar qoıyldy. Soǵan baılanysty, aldaǵy sessııa barysynda áleýmettik baǵyttaǵy birshama zańdarǵa ózgerister engizýdi qarastyramyz. Sol úshin elordalyqtardyń áleýmettik saıasatqa qatysty usynystaryn bilgimiz keledi», - dedi Májilistegi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev.

Onyń aıtýynsha, kezdesýler barysynda astanalyqtar áleýmettik salada naqty-naqty usynystar aıtqan. Bunyń ishinde balabaqsha men mektepterdiń jetispeýshiligine qatysty máselelerdi jıi kótergen. Sondaı-aq, depýtattar tarapynan zeınetkerlikke shyǵý jasyna qatysty suraqtar týyndaǵan. «Biz astanalyqtar tarapynan jasalǵan eskertýler men usynystardy aldaǵy jumysymyzda eskeretin bolamyz», - dedi M. Áshimbaev.