Májilis depýtattary Qyzylorda turǵyndaryn tolǵandyrǵan saýaldarǵa jaýap berdi
QYZYLORDA. QazAqparat - Qyzylorda oblysyna jumys sapary barysynda QR Parlamenti Májilisiniń depýtattary, «Nur Otan» partııasy depýtattyq fraktsııasynyń músheleri Ǵalym Ámireev, Baqytbek Smaǵul men Gennadıı Shıpovskıh turǵyndardy qabyldady, dep habarlaıdy QazAqparat tilshisi.
Depýtattardyń qabyldaýyna 80-ge jýyq qyzylordalyq azamat túrli ótinish-tilekpen keldi. Onyń ishinde quqyqtyq, kásipkerlik, óńirdegi qýańshylyq, densaýlyq saqtaý, turǵyn úı, áleýmettik kómek alý, jerge qatysty máseleleri bar.
Depýtattar olardyń árqaısysyn jiti nazarǵa aldy.
Qyzylorda qalasynyń turatyn kópbalaly ana Nazerke Kadırova densaýlyq, áleýmettik, balalardyń bilim máselesine qatysty sheshilmeı júrgen problemalyq máselelerdi de alǵa tartty.
Al syrdarııalyq Qaırat Jalǵasov depýtattarǵa jaıylymdyq jer, Syrdarııa ózenindegi sý deńgeıi jaıynda oı qozǵady.
Búginde Qyzylorda qalasynda 2005-2006 jyldary jer kezegine turǵan azamattarǵa jer telimi berilýde.
Degenmen, turǵyndar arasynda ózine berilgen jer teliminiń qolaısyz jerde ornalasqanyn, balabaqsha, mektepten alys ekenin aıtyp, shaǵymdanyp júrgender bar.
«Óńirge sapar barysynda jergilikti turǵyndarmen birneshe kezdesý ótkizildi. Olardy qandaı qandaı máseleler tolǵandyryp júrgenine zer saldyq. Aýyl jáne qala turǵyndary ótinishteri arasynda aıyrmashylyq bar. Aýyldyqtardy negizinen is bastaý úshin nesıe alý, mal jaıylymy, aıaq sý jáne sýbsıdııa tolǵandyrady.Al qalalyqtar baspana, turmystyq sıpattaǵy máselelerdi sheshý tóńireginde shaǵymdandy»,- dedi Baqytbek Smaǵul.
