Májilis depýtattary qytaılyq áriptesterimen onlaın kezdesý ótkizdi
Taraptar áńgimelesý barysynda ekijaqty yntymaqtastyqtyń, halyqaralyq uıymdardaǵy ózara is-qımyldyń jáne óńirdegi qazirgi ahýaldyń keń aýqymdy máseleleri boıynsha pikir almasty. Sondaı-aq 2022 jyly 30 jyldyǵy atap ótiletin ekijaqty qarym-qatynastardyń qarqyndy jáne údemeli damýy týraly aıtty.
Májilis tóraǵasynyń orynbasary Nur-Sultan men Beıjiń arasynda dıplomatııalyq qarym-qatynas ornaǵan 28 jyl ishinde qarqyndy saıası dıalog pen tereń ekonomıkalyq baılanystar ornap, jan-jaqty ózara is-qımyl serpindi damyp kele jatqanyna toqtaldy.
Gúlmıra Isımbaeva áńgimelesý barysynda bul eki el keshbasshylarynyń eńbegi ekenin, Qazaqstan-Qytaı qarym-qatynastarynyń qalyptasýy men nyǵaıýynda Qazaqstannyń Tuńǵysh Prezıdenti, Elbasy Nursultan Nazarbaevtyń erekshe rólin atap ótti. Al Memleket basshysy Qasym-Jomart Toqaevtyń sapary jáne sol resmı sapar barysynda birlesken málimdemege qol qoıylýy Qazaqstan-Qytaı qatynastarynyń jańa dáýiriniń bastalýy ekenine nazar aýdardy.
Óz kezeginde Qytaı Parlamentiniń ókili Qazaqstanmen ekijaqty yntymaqtastyqty odan ári nyǵaıtýǵa úlken qyzyǵýshylyq tanytyp, olardy «qazirgi zamanǵy halyqaralyq qatynastardaǵy dostyq pen tatý kórshiliktiń etalony» dep atady.
Ekonomıkalyq ózara is-qımyl týraly áńgime barysynda taraptar QHR-nyń «Bir beldeý – bir jol» bastamasyna jáne Qazaqstan Respýblıkasynyń Tuńǵysh Prezıdenti Nursultan Nazarbaevtyń «Nurly jol» baǵdarlamasyna úlken kóńil bólinetinin málimdedi.
Budan basqa otyrysta koronavırýstyq ınfektsııa pandemııasynyń teris saldaryn azaıtý boıynsha tájirıbe almasý úshin eki eldiń kúsh-jigerin úılestirýdiń mańyzdylyǵy atap ótildi.
Osyǵan baılanysty Qytaı vıtse-spıkeri Qazaqstannyń eldegi epıdemııalyq jaǵdaıdyń shıelenisýi kezeńinde kórsetken kómegi úshin alǵys aıtyp, COVID-19 indetine qarsy jańa ekpe ázirlep, ony synamadan ótkizgeni týraly habarlady.
Óz kezeginde Gúlmıra Isımbaeva Qytaı dárigerlerine konsýltatıvtik jáne tájirıbelik kómek kórsetkeni úshin rızashylyǵyn bildirdi.
Sonymen qatar, taraptar ekonomıkany tsıfrlandyrý, jasandy ıntellekt, aýyl sharýashylyǵy, densaýlyq saqtaý, kólik jáne basqa da salalardaǵy yntymaqtastyqty odan ári keńeıtý qajettigin atap ótti.
Áńgimelesý barysynda eki eldiń zań shyǵarýshy organdarynyń syndarly jáne serpindi dıalog isindegi mańyzdy róli atap ótildi.
Kezdesýge Májilis depýtattary Muhtar Erman men Qýanysh Sultanov qatysty.