Májilis depýtattary QR Tuńǵysh Prezıdenti - Elbasy mártebesin zań deńgeıinde bekitýge arnalǵan zań jobasyna bastama jasady
ANA. Mamyrdyń 5-i. QazAqparat /Qanat Mámetqazyuly/ - Bir top Májilis depýtattary Elbasy mártebesin zań deńgeıinde bekitý týraly zań jobasyn usyndy.
Osyǵan oraı eki zań jobasy búgin QR Parlamenti Májilisiniń jalpy otyrysyna atalǵan máseleni kún tártibine engizgen soń, qujattarǵa qorytyndy ázirleý merzimi bekitildi, dep habarlaıdy QazAqparat.
«Kezinde Abylaı hannan «Ne armanyń bar?» dep suraǵanda «Úsh júzdiń basyn qossam dep edim, qosa almadym. Qala salsam dep edim, sala almadym. Qazaqty birtutas el etsem dep edim, ony da isteı almadym» degen eken. Alash asyldarynyń osyndaı maqsatyn, «myń ólip, myń tirilgen» qazaq halqynyń san ǵasyrlyq ańsaýly armanyn iske asyryp, 1991 jyly syn saǵattar týǵan kezeńde derbes memleket - Táýelsiz Qazaqstandy qurý - elimizdiń Tuńǵysh Prezıdenti N.Á.Nazarbaevtyń qajyrly eńbeginiń, naǵyz Erliginiń arqasynda boldy. Keıbir memleket basshylary, óz ultynyń azamattaryn da basyn biriktire almaı, qyrylysyp, atysyp jatqanda, Qazaqstanda turatyn 130-dan astam etnos ókilderin qazaqtyń qasıetti berekeli shańyraǵynyń astynda toptastyryp, olardyń birligin, yntymaǵyn nyǵaıtýdaǵy, ultaralyq jáne konfessııaaralyq kelisimdi, qoǵamdaǵy tatýlyqty úılestirýdegi Nursultan Nazarbaevtyń erlikke toly eńbegin búginde tek qana qazaqstandyqtar emes, búkil álem tanyp, moıyndap otyr», dedi bastamashy depýtattar atynan sóılegen Rozaqul Halmuradov. Sonymen birge, depýtat Tuńǵysh Prezıdenttiń qajymas qaıraty men danalyǵynyń, erligi men batyldyǵynyń arqasynda táýelsiz memleketimizdiń shekarasy bekitilgenin, halyq qasiretiniń oshaǵy bolǵan Semeı atomdyq synaq polıgony jabylǵanyn, Saryarqanyń tórinde boı kótergen Astana qalasy elimizdiń maqtanyshyna aınalǵanyn atap ótti.
«Nursultan Nazarbaev - álem moıyndaǵan, jahanǵa ataǵy jetken, jer jahanǵa sózi ótip, aıtqanyn istetip otyrǵan búgingi zamannyń Djordj Vashıngton, Atatúrik, Gandı sııaqty tek dara tulǵalarǵa tán kóshbasshylyq, qasıetimen jarqyn kúnderge jol bastaǵan Elbasymyz. Qazaqstan Respýblıkasynyń Prezıdenti Nursultan Ábishuly Nazarbaev - Prezıdent qana emes, qazirgi zamanǵa laıyqty memleket - Qazaqstan Respýblıkasynyń negizin qalaýshy, respýblıkanyń qarqyndy ekonomıkalyq ósýine, halyqtyń ál-aýqatynyń artýyna qol jetkizgen jáne barsha órkenıetti álem moıyndaǵan tulǵa», dedi ol.
Osyǵan baılanysty Parlament Májilisiniń bir top depýtattary bastamashy bolyp Qazaqstan Respýblıkasynyń Tuńǵysh Prezıdenti - Elbasynyń erekshe tarıhı mıssııasyna oraı onyń konstıtýtsııalyq ókilettikterin naqty reglamentteýdi, sondaı-aq onyń qyzmetin qamtamasyz etýdiń kepildikterin kózdeıtin eki Zań jobasyn ázirlengen. Soǵan oraı, Parlament Májilisiniń jalpy otyrysynyń kún tártibine «Qazaqstan Respýblıkasynyń keıbir konstıtýtsııalyq zańdaryna Qazaqstan Respýblıkasy Tuńǵysh Prezıdentiniń - Elbasynyń qyzmetin qamtamasyz etý salasyndaǵy zańnamany jetildirý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Konstıtýtsııalyq Zańynyń jobasy jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Tuńǵysh Prezıdentiniń - Elbasynyń qyzmetin qamtamasyz etý salasyndaǵy zańnamany jetildirý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy engizilip, ol boıynsha qorytyndy ázirleý merzimi bekitildi.
