Májilis depýtattary kóterme-taratý ortalyqtaryn qurý máselelerin talqylady
NUR-SULTAN. QazAqparat – Májilistiń Agrarlyq máseleler komıteti 7-8 qazanda Qaraǵandy oblysynda «Kóterme-taratý ortalyqtarynyń jelisin qurýdyń jáne damytýdyń ózekti máseleleri» taqyrybynda kóshpeli otyrys ótkizdi, dep habarlaıdy QazAqparat.
«Jumys sapary barysynda depýtattar «Global City» kóterme-taratý ortalyǵy, «Astra-Agro LTD» elıtalyq tuqym ósirý sharýashylyǵy, «Shans» sharýa qojalyǵynda bolyp, olardyń agrarlyq ónerkásip kesheni salasyndaǵy ozyq qyzmetimen tanysty», - delingen Májilis baspasóz qyzmetiniń málimetinde.
Memleket basshysynyń Joldaýyn iske asyrý aıasynda uıymdastyrylǵan komıtet otyrysyna depýtattarmen qatar, Aýyl sharýashylyǵy, Saýda jáne ıntegratsııa mınıstrlikteriniń, sondaı-aq Qaraǵandy oblysy ákimdiginiń ókilderi, aýyl sharýashylyǵy taýarlaryn óndirýshiler qatysty.
Komıtet otyrysynda kóterme-taratý ortalyqtaryn qurý jáne damytý, saýda-logıstıkalyq ınfraqurylymnyń artyqshylyqtary ári onyń áleýetin agroazyq-túlik naryǵynyń barlyq qatysýshylarymen paıdalaný múmkindigi máseleleri talqylandy. Otyrysty ashqan Májilis depýtaty, Agrarlyq máseleler komıtetiniń tóraǵasy E. Barlybaev qazirgi koronavırýstyq pandemııa jaǵdaıynda qazaqstandyqtardy áleýmettik mańyzy bar azyq-túlikpen ózin-ózi qamtamasyz etý máselesiniń ózektiligin atap ótti.
Taqyrypqa qatysty baıandama jasaǵan Saýda jáne ıntegratsııa vıtse-mınıstri E. Qazanbaev kóterme taratý ortalyqtary qaı merzimde salynatynyna toqtalsa, Aýyl sharýashylyǵy vıtse-mınıstri J. Óserbaı búginde jumys istep turǵan kóterme-taratý ortalyqtarynyń oń nátıjeleri týraly baıandap berdi.
Jalpy, otyrysqa qatysýshylar fermerlerdiń kóterme-taratý ortalyqtarymen ózara is-qımyl tetigi aýyl sharýashylyǵy ónimderin óndirý kólemin ulǵaıtýǵa jaǵdaı jasaıtynyn, deldaldyq tizbektiń baılanystaryn azaıtatynyn, otandyq aýyl sharýashylyǵy ónimderin eksporttaýǵa, jańa jumys oryndaryn qurýǵa jáne azyq-túlik taýarlaryna baǵany turaqtandyrýǵa qatysty máselelerdi sheshýge múmkindik beretinin aıtty. Іs-shara qorytyndysy boıynsha otyrysqa qatysýshylar ýákiletti organdarǵa kóterme-taratý ortalyqtarynyń jelisin odan ári qurý jáne damytý máseleleri turǵysynda tıisti tapsyrmalar berdi.
