Májilis depýtattary Qostanaı turǵyndarymen kezdesti
QOSTANAI. QazAqparat – Qostanaı oblysyna jumys saparmen kelgen Qazaqstan Respýblıkasy Parlamenti Májilisiniń depýtattary Áýlıekól aýdanyna baryp, birqatar áleýmettik nysandy aralady, dep habarlaıdy QazAqparat.
Halyq qalaýlylary Áýlıekól aýdanynyń aktıvimen kezdesti. Turǵyndar túıtkildi máselelerin aıtyp, usynystaryn bildirdi. Máselen, aýdan turǵyny Faına Mıhaılovna saýda-sattyq nysandaryna birneshe jyl boıy gaz qubyrynyń júrgizilmegenin aıtty. Ol 40 saýda uıymynyń ókili qol qoıǵan usynys hatty depýtattarǵa usyndy.
Depýtat Qýanysh Sultanovtyń aıtýynsha, mundaı másleler ár óńirde bar. Sol sebepti QR Prezıdenti Qasym-Jomart Toqaevtyń tapsyrmasy boıynsha, depýtattar eldi mekenderdi aralap, turǵyndardyń máselelerin sheshýge atsalysýda.
Áýlıekól bastaýysh mektep-ınternatynyń ujymymen áńgime barysynda depýtattar «Pedagog mártebesi týraly» Zańnyń qabyldanýyna baılanysty ózgeristerdi túsindirip berdi.
«Jańa zań pedagogtardyń kásibı qyzmettegi quqyqtary men mindetterin egjeı-tegjeıli kórsetedi jáne materıaldyq jaǵynan qamtamasyz etedi. Buǵan qosa áleýmettik kepildikterge qatysty normalardy qamtıdy. Halyqaralyq olımpıada, túrli baıqaý jáne sport jarystarynyń jeńimpazyn ázirlegen muǵalimdi úsh eńbekaqy mólsherinde syıaqymen marapattaý, aýyldyq jerde turatyn muǵalimderge jer telimin alýda basymdyq berý máselesi qarastyrylǵan», - dedi depýtat Irına Aronova.
«NurOtan» partııasy fraktsııasynyń múshesi Albert Raý Krasnooktıabr boksıt kenishi basqarmasynyń avtokólik tsehi ujymymen kezdesti.
Lısakov qalasynyń janynda ornalasqan Krasnooktıabr boksıt kenishi basqarmasy – TMD elderindegi boksıt óndirý boıynsha taý-ken kásiporyndar arasyndaǵy eń aýqymdysy. Ken ornynyń qory 120 mln tonnany quraıdy. Kásiporyn qazaqstandyq tústi metallýrgııanyń flagmany sanalatyn «Qazaqstan Alıýmınııi» AQ úshin negizgi shıkizat jetkizýshisi sanalady.
Tsehta májilismender Memleket basshysy Qasym-Jomart Toqaevtyń Qazaqstan halqyna Joldaýynyń iske asyrylýy jáne depýtat retinde atqarǵan jumysy jónindesóz qozǵady. Óz kezeginde kásiporyn jumysshylary avtokólik tsehiniń negizgi qyzmeti týraly baıandap berdi.
