Májilis depýtattary koronavırýsqa qarsy ekpe saldyrdy
NUR-SULTAN. QazAqparat - Májilis depýtattary Zarına Kamasova, Ǵalymjan Eleýov jáne Larısa Pavlovets búgin koronavırýs ınfektsııasyna qarsy ekpe jasady, dep habarlaıdy QazAqparat.
Májilis depýtattary vaktsınanyń bastapqy kezeńinen ózderiniń medıtsınalyq áriptesterimen qatar alǵashqylardyń biri bolyp ótti. Olar VII shaqyrylymdaǵy Májilis depýtattary bolyp saılanǵanǵa deıin indetpen kúres sheńberinde aımaqtarda medıtsınalyq mekemelerde jumys istep, halyqqa qajetti kómek kórsetti.
Depýtattar jappaı vaktsınatsııalaý ujymdyq ımmýnıtetti tez qalyptastyrýǵa jáne qazaqstandyqtardyń ómirin qalypty jaǵdaıǵa keltirýge múmkindik beretinine senim bildirdi.
«Dáriger retinde men qazir jappaı vaktsınatsııalaý ǵana koronavırýstyń taralýyna qarsy tura alatyndyǵyn jaqsy túsinemin. Árıne, bul ár adamnyń erki. Men naqty sheshim qabyldadym: ekpe jasatamyn. Óıtkeni, ol meniń de, týystarym men dostarymnyń da densaýlyǵy osyǵan baılanysty», - dedi Májilis depýtaty Ǵalymjan Eleýov.
Depýtattar ekpe engizilgennen keıin densaýlyqtarynyń birqalypty ekendikterin aıtty.
Sonymen qatar, jýrnalıster Májilistiń basqa depýtattaryn, onyń ishinde Májilis Tóraǵasy Nurlan Nyǵmatýlınniń ekpe saldyrý jospary týraly surady.
Májilistiń baspasóz qyzmeti túsindirgendeı, qalǵan depýtattardy vaktsınatsııalaý naýryz aıynda Densaýlyq saqtaý mınıstrliginiń kestesine sáıkes júrgiziledi. Al, Májilis Tóraǵasyna qatysty aıtar bolsaq, Nurlan Nyǵmatýlın osyǵan deıin koronavırýs ınfektsııasymen aýyrǵandyqtan, jetkilikti antıdeneler bar. Osyǵan sáıkes, ekpe saldyrýdy qajet etetin medıtsınalyq kórsetkishteri joq.
