Májilis depýtattary Qoldanbaly etnosaıası zertteýler ınstıtýtynyń jobalarymen tanysty
NUR-SULTAN. QazAqparat - Qazaqstan halqy Assambleıasynan QR Parlamenti Májilisiniń depýtattary Qoldanbaly etnosaıası zertteýler ınstıtýtynyń jumysymen tanysty, dep habarlaıdy QazAqparat tilshisi.
«Búgingi is-shara barysynda depýttar ınstıtýttyń iske asyryp jatqan jobalarymen tanysty. Olar 2020 jyly biz qamtyǵan jobalardyń mańyzdylyǵyn, sondaı-aq ınstıtýt jumysynyń joǵary nátıjeliligin atap ótti. Osy oraıda kúsh-jigirdi etnomádenı birlestiktermen shoǵyrlandyrý jáne etnomádenı birlestikter resýrstaryn paıdalanýdy usyndy. Munymen qosa, bizdiń ınstıtýt júrgizetin zertteýler aıasynda depýtattarmen birge óńirlerge saparmen barýdyń qajettigi aıtyldy. Biz ózimizdiń monıtorıngti júrgizemiz, sonymen qatar depýtattar óńirlerge saparlaǵanda birlese jumystardy atqarmaqpyz», - dedi «Qoldanbaly etnosaıası zertteýler ınstıtýty» JShS dırektory Talǵat Qalıev.
Instıtýt basshysynyń paıymynsha, óńirlerdegi máselelerdi sheshýde Parlament depýtattarymen birlese jumys isteý eleýli nátıje beredi.
«Etnosaralyq qatynastar boıynsha ári osy saladaǵy zertteýlerde, jumystarda únemdeý bolmaýy kerek degen paıym aıtyldy. Jalpy, bul baǵytta zertteý jumystary laıyqty deńgeıde bolǵany abzal. 2020 jyly koronavırýs indetine baılanysty keıbir kedergiler bolǵanymen, biraz zertteýler júrgizildi. Alǵa qoıylǵan maqsattar oryndaldy. Byltyr ınstıtýt qurylǵannan keıin jeti aıdyń ishinde aýqymdy materıal jınap úlgerdik. Osy materıaldardy búgin depýtattarǵa tanystyrdyq. Atap aıtqanda, ınstıtýt mamandary jınaqtaǵan taldaý materıaldaryna toqtalsaq, buǵan deıin zerttelmegen ári asa mán berilmegen jekeleı problemalar anyqtaldy», - dedi Talǵat Qalıev.
