Májilis depýtattary qoǵamdyq baqylaý jumystaryna qatysýda
NUR-SULTAN. QazAqparat – Májilis depýtattary koronavırýs indetiniń taralýyna qarsy birqatar máseleni baqylaýǵa aldy. Bul týraly QazAqparat Májilistiń baspasóz qyzmetine silteme jasap habarlaıdy.
Qazirgi ýaqytta Májilis depýtattary óńirlerde koronavırýspen kúres jónindegi keshendi jumystarǵa belsene aralasýda.
Olar qoǵamdyq baqylaý toptarymen birge dárihanalarǵa baryp, dári-dármekterdiń, medıtsınalyq maqsattaǵy buıymdar men baǵalarǵa monıtorıng júrgizýde. Sonymen qatar, eriktilerdiń jumysyn uıymdastyrýǵa járdemdesip, medıtsınalyq mekemelerge gýmanıtarlyq kómektiń jetkizilýi men taratylýyn, halyqty qajetti taýarlarmen jáne azyq-túlikpen qamtamasyz etýdi baqylaýǵa aldy.
Sondaı-aq, dárigerlerdiń jumys jaǵdaılary men aýrýhanadaǵy emdelýshilerdiń jaǵdaılaryna erekshe kóńil bólinýde.
Májilis depýtattary Záýresh Amanjolova men Serik Qusaıynov Almatydaǵy Ortalyq qalalyq klınıkalyq aýrýhanaǵa baryp, medıtsına qyzmetkerlerimen kezdesti. Kezdesý barysynda koronavırýspen emdelip jatqan emdelýshilerdi aralap, aýrýhananyń dárihana qoımasymen tanysty.
Medıtsınalyq mekeme bir mezgilde COVID-19 dıagnozy qoıylǵan 320 naýqasty qabyldaı alady.
Kún saıyn aýysymǵa aýrýhananyń 150 qyzmetkeri túsedi. Medıtsınalyq mekeme barlyq týyndaǵan máselelerdi jyldam sheshýge tyrysýda.
«Biz jańa modýldik aýrýhanany arnaıy teksermedik. Óıtkeni, ol jańa apparattar men preparattarmen qamtamasyz etilgen. Al bul mekeme 70-shi jyldary salynǵan jáne bastapqyda osyndaı maqsattarǵa arnalmaǵan. Degenmen, ol qaıta jabdyqtaldy. Sonymen qatar, koronavırýsty emdeýge arnalǵan dári-dármekterdiń bir aıǵa jetetin qory bar», - dedi Májilis depýtaty Záýresh Amanjolova.
Aýrýhana basshylyǵy emdelýshilerdi qabyldaý múmkindigin arttyrý úshin qosymsha sharalar qabyldanyp jatqanyn aıtty.
Jalpy aıtqanda, Májilis depýtattarynyń aımaqtardaǵy jumysynyń basty baǵyty dárihanalarda dári-dármekter men medıtsınalyq maqsattaǵy buıymdardyń, sondaı-aq dári-dármekterdiń baǵasyna monıtorıng júrgizý.
Sybaılas jemqorlyqqa qarsy is-qımyl agenttigi qyzmetkerlerimen jáne belsendilermen birge Májilis depýtaty Snejanna Imasheva Nur-Sultan qalasynda, al májilismender Gleb Şegelskıı men Quralaı Qaraken Aqtóbe qalasyna bardy. Májilis depýtattary Irına Aronova men Aıgúl Nurkına Qostanaı men Pavlodardaǵy medıtsınalyq mekemelerge gýmanıtarlyq kómektiń taralýyn baqylaýda ustaıtyn bolady. Májilismender, eń aldymen, gýmanıtarlyq taýarlardyń, ásirese, medıtsınalyq uıymdarǵa jetkizilýine basa nazar aýdarýda.
Sonmen qatar, Májilis depýtattary halyqty áleýmettik qoldaýǵa erekshe mán berýde. Májilis depýtaty Erlan Barlybaev Almaty oblysyndaǵy Baıserke aýylyna baryp, 12 áleýmettik jaǵdaıy tómen otbasyna kómek berdi. Aýyl turǵyndarymen áńgimelesý barysynda ol eshkimniń qoldaýsyz qalmaıtynyn aıtyp, halyqty sabyrly bolýǵa shaqyrdy.
