Májilis depýtattary qaza tapqan shekarashylardyń otbasylaryna birkúndik jalaqylaryn aýdardy
ASTANA. 5 maýsym. QazAqparat - Búgin Qazaqstan halqy 15 adamnyń ómirin jalmaǵan qaıǵyly oqıǵadan qara jamylyp otyr.
QR Parlamenti Májilisiniń depýtattary ózderiniń bir kúngi eńbekaqylaryn Almaty oblysynyń «Arqankergen» beketinde qaza tapqan shekarashylardyń otbasylaryna kómek retinde aýdarady. Bul týraly Májilis Apparatynyń baspasóz qyzmetinen málim etti.
Keshe Elbasy, Qazaqstan Respýblıkasynyń Prezıdenti Nursultan Nazarbaev málimdeme jasap, elimizde bir kúndik ulttyq aza tutý jarııalady.
«Shekarashylar eldiń shebin qorǵaý kezinde, qazaqstandyqtardyń tynyshtyǵy men qaýipsizdigin saqtaý qyzmetinde turǵanda qaza boldy. Olar Qazaqstannyń beıbitshiligi men bolashaǵy jolynda qyrshynynan qıyldy. Bul tragedııa qaza tapqandardyń otbasylary men aǵaıyn-týǵandarynyń ǵana emes, barsha qazaqstandyqtardyń qabyrǵasyn qaıystyryp otyr»,- dedi óz málimdemesinde Memleket basshysy.
