Májilis depýtattary qaıyrymdylyq, demeýshilik pen metsenattyqqa salyqtyq jeńildikti arttyrýdy usynady

ASTANA. QazAqparat - Qaıyrymdylyq, demeýshilik pen metsenattyqqa salyqtyq jeńildikterdi arttyrý qajet. Bul týraly búgin Májilistiń Áleýmettik-mádenı damý komıtetinde «Qaıyrymdylyq, demeýshilik jáne metsenattyq qyzmet týraly» zań jobasynyń tanystyrylymynda málim boldy. Esterińizge sala keteıik, atalǵan zań jobasyna Májilis depýtattary bastamashylyq jasaǵan bolatyn.

Zań jobasy túrli sebeptermen ómirdiń qıyn jaǵdaıyna tap bolǵan el azamattaryna jáne azamattyǵy joq tulǵalarǵa kómek kórsetý jáne qoldaý salasynda quqyqtyq bazany qurý maqsatynda ázirlengen. Sonymen qatar qazirgi ýaqytta zańnamada qaıyrymdylyq múmkindikteri, ony iske asyrýdyń zamanaýı tásilderi jetkilikti túrde yntalandyrylǵan joq, sonymen birge áleýmettik, ekonomıkalyq jáne quqyqtyq saıasattyń myqty qabatyn quraıtyn qaıyrymdylyq, demeýshilik jáne metsenattyq qyzmettiń quqyqtyq erekshelikteri joq.

«Qaıyrymdylyq, demeýshilik qoldanystaǵy zańnamada belgilengen jáne onda úsh paıyzǵa deıingi salyqtq jeńildik dep kórsetilgen. Al metsenattyq nege ekeni qalys qalǵan. Meniń paıymymsha, kerisinshe, metsenattyq eń birinshi orynda turýy kerek. Óıtkeni, bul mádenıetke tikeleı qatysty dúnıeler ǵoı. Sondyqtan da, biz ilespe zań jobasyna olardy 10 paıyzǵa deıin kóretý týraly usynys jasadyq», - deıdi depýtat Nıkolaı Kýzmın.

Onyń aıtýynsha, qujatty qabyldaý zańnamalyq deńgeıde áleýmettik ómirdiń túrli salasy men ortasynda múddeli tulǵalardyń qyzmetimen qaıyrymdylyq, demeýshilik jáne metsenattyq qyzmetti iske asyrýmen baılanysty qatynastardyń quqyqtyq retteýin bekitýge, osy qyzmetke qatysýshylardy úılestirýge jáne árekettesýge yqpalyn tıgizedi.

Qazaqstan Respýblıkasyn áleýmettik jáne quqyqtyq memleket retinde belgileý qaıyrymdylyq, demeýshilik jáne metsenattyq qyzmetti iske asyrý úshin osyndaı qyzmettiń álemde tanylǵan úlgilerge sáıkes quqyqtyq negizderdi jasaý qajettiligin aıqyndaıdy.