Májilis depýtattary indet kezinde aýyldaǵy jumyspen qamtý máselelerin talqylady
QARAǴANDY OBLYSY. QazAqparat - Májilis depýtattary Gúlnar Bıjanova men Vasılıı Oleınık Qaraǵandy oblysyna jumys sapary barysynda Buqar jyraý aýdanynyń aýyldyq okrýgterinde bardy. Bul týraly QazAqparat Májilistiń baspasóz qyzmetine silteme jasap habarlaıdy.
Májilismender koronavırýspen kúresýge, jergilikti halyqty jumys oryndarymen qamtamasyz etýge, sondaı-aq memlekettik baǵdarlamalardy júzege asyrýǵa baǵyttalǵan máselelerdi nazarlaryna aldy.
Doskeı aýyldyq okrýginde Májilis depýtattary bes qabatty ǵımarattyń jóndeý jumystarymen, modýldi qazandyqtyń qurylysymen jáne aýyl ishindegi joldardyń abattandyrylýymen, sondaı-aq dárihanalardyń jumysymen tanysty.
Májilismenderdiń pikirinshe, osyndaı kúrdeli kezeńde memlekettiń negizgi mindetteriniń biri - ártúrli qyzmet salalarynda memlekettik tapsyrystar berý arqyly halyqty turaqty jumys oryndarymen qamtamasyz etý, shaǵyn jáne orta bıznesti qoldaý.
G. Bıjanova men V. Oleınık atap ótkendeı, bul mindet Qaraǵandy oblysynyń Buqar jyraý aýdanynda tolyǵymen oryndalýda.
Doskeı aýylynda kóp qabatty úılerde jylý jáne ystyq sý problemalaryn sheshýge múmkindik beretin modýldi qazandyq salý úshin, negizinen Qazaqstanda jasalǵan óndiristiń materıaldary men jabdyqtary qoldanylýda.
Sonymen birge aýyl turǵyndary «Jumyspen qamtýdyń jol kartasy» memlekettik baǵdarlamasy aıasynda salynyp jatqan nysanda jumys isteıdi.
Aýylda bes qabatty 40 páterlik úıge kúrdeli jóndeý jumystary da bastalǵan. Merdiger de jergilikti. Jóndeý jumystaryna oblystyq bıýdjetten 120 mıllıon teńge, aýdandyq bıýdjetten taǵy 75 mıllıon teńge bólingen. Aıaqtalý merzimi - aǵymdaǵy jyldyń qazan-qarasha aılary.
Májilismender aýyldyq okrýgke jasaǵan jumys sapary barysynda dári-dármekterdiń qajetti tizimi tolyq kólemde qoljetimdi ekenin jáne olardyń baǵasy qaladaǵydan tómen ekenin atap ótti.
Jergilikti ákimshilik barlyq epıdemııaǵa qarsy sharalardyń qatań oryndalýyn únemi qadaǵalap otyrady.
Sapar barysynda Májilis depýtattary Botaqara aýdan ortalyǵynda oblystyq aýrýhananyń dárigerlerimen sóılesti. Dárigerlerdiń aıtýynsha, karantın tártibiniń engizilýi emdelýshilerdiń sanyn azaıtqan. Osy kezdesýde birqatar problemalyq máseleler de kóterildi.
Eń aldymen, bul bıýdjet salasynyń qyzmetkerlerine turǵyn úıdi jalǵa alý quqyǵynyń joqtyǵy.
Eger muǵalimderge qatysty másele «Pedagog mártebesi týraly» Zańmen sheshilse, onda medıtsına qyzmetkerlerine, ásirese qaladan aýylǵa keletinder úshin bul óte mańyzdy bolar edi. Májilis depýtattary bul máseleni óz baqylaýlaryna aldy.
Buqar jyraý aýdanyna jasaǵan saparynda májilismender turǵyn úımen qamtamasyz etý máselesi qalaı sheshilip jatqanyna nazar aýdardy. Kóp balaly otbasylar úshin úsh qabatty jalǵa berý úıi salynýda (54 páter, jalpy aýdany 3402 sh.m.)
Onyń ishinde Úshtóbe aýylynda 18 páterlik bir úı, Botaqara aýylynda 36 páterlik eki úı salynýda. Merdiger - qaraǵandylyq shaǵyn qurylys kompanııasy, ol osy jyldyń qarasha aıynda nysandardy ýaqytynda jetkizýge kepildik beredi.
Sonymen qatar, ekinshi naryqtan kóp balaly otbasylarǵa páter satyp alýǵa oblystyq bıýdjetten aqsha bólindi.
Májilis depýtattary G.Bıjanova men V. Oleınık Óńirlerdi damytý baǵdarlamasynyń arqasynda Botaqara jáne Qarajar aýyldarynyń sý qubyrlary qaıta jańǵyrtylatynyna kóz jetkizdi. «Jumyspen qamtýdyń jol kartasy» baǵdarlamasy boıynsha eki joba júzege asyrylýda. Olar: «Jańaqala aýylynda sýmen jabdyqtaý jelileriniń qurylysy» jáne «Sheshenqara aýylynda sýmen jabdyqtaý jelilerin qaıta qurý».
Aıta ketý kerek, memlekettik satyp alý salasyna qatysty birqatar problemalyq máseleler kóterildi. Depýtattar bul máseleni qosymsha zerdeleý qajettiligin atap ótti.
Qaraǵandy oblysynda odan ári jumys saparyn jalǵastyrǵan Májilis depýtattary aýyldyq eldi mekenderde «Aýyl-el besigi» baǵdarlamasyn júzege asyrýǵa erekshe nazar aýdarady.
