Májilis depýtattary Halyqtyń qonystanýy men damýy jónindegi Azııa parlamentshileriniń forýmyna qatysty
NUR-SULTAN.QazAqparat – Qazaqstan ókilderi Halyqtyń qonystanýy men damýy jónindegi Azııa parlamentshileriniń forýmyna qatysýyn odan ári jalǵastyrý týraly nıetin Májilistiń Vıtse-spıkeri Gúlmıra Isımbaeva aıtty.
Bul týraly búgin qazaqstandyq Parlament ókilderi beınekonferentsııa formatynda ótken Azııa parlamentshileri forýmy Atqarýshy komıtetiniń 89-shy otyrysynda sóılegen sózinde málimdedi.
Gúlmıra Isımbaevanyń aıtýynsha, uıym qyzmet etken jyldar ishinde turaqty damý maqsattaryn iske asyrý boıynsha zańnamalyq bazany qalyptastyrý jáne keńeıtý máseleleri boıynsha kóptegen jumystar atqardy. Bul Parlament ókilderiniń Azııa óńirindegi halyq sany men damý problemalaryn sheshýge qosqan qomaqty úlesi.
Jıyn barysynda Májilis tóraǵasynyń orynbasary parlamentshilerdiń jastardy qoldaý máselelerine erekshe nazar aýdarǵanyna toqtalyp, 2018 jyly Qazaqstan astanasynda «Jastarǵa – Investıtsııa» atty halyqaralyq konferentsııa uıymdastyrǵanyn atap ótti.
Májilis Vıtse-spıkeri Qazaqstannyń ulttyq, óńirlik jáne jahandyq deńgeıde halyqtyń qonystanýy men ornyqty damý problemalarymen aınalysatyn barlyq halyqaralyq uıymdarmen belsendi yntymaqtastyq ornatqanyna nazar aýdardy.
Gúlmıra Isımbaeva Azııa-Tynyq muhıty óńiriniń halyq sany men demografııasy máseleleri boıynsha derekter bazasyn qurý, ortaq zańdylyqtar men erekshelikterdi anyqtaý, demografııalyq problemalardy sheshýde tájirıbe almasý jáne jınaqtaý memleketterge aldyn alý sharalaryn qabyldaýǵa jáne sol arqyly kóptegen áleýmettik problemalardy boldyrmaýǵa múmkindik beretinine toqtaldy.
Sonymen qatar Májilis tóraǵasynyń orynbasary pandemııa kezindegi kúrdeli ekonomıkalyq jaǵdaıda áleýmettik-ekonomıkalyq baǵdarlamalar Qazaqstandaǵy memlekettik saıasattyń basym baǵyty bolyp otyrǵanyna nazar aýdardy. Osyǵan sáıkes, Memleket basshysy Qasym-Jomart Toqaevtyń tapsyrmasy boıynsha halyqtyń áleýmettik qorǵalmaǵan toptaryna qoldaý kórsetý jáne jumys oryndaryn saqtaý úshin sharalar kesheni ázirlenin atap aıtty.
Sondaı-aq, beınekonferentsııa formatynda ótken otyrysta Azııa parlamentshileri forýmynyń tóraǵasy Keızo Takımı jáne uıymnyń ýaqytsha atqarýshy dırektory Kııoko Ikegamı quttyqtaý sóz sóıledi.
Jıyn barysynda qatysýshylar uıymnyń qyzmeti týraly esepti jáne aldaǵy kezeńge arnalǵan josparlardy talqylady.
