Májilis depýtattary general S.Rahymovtyń jádigerlerin elge qaıtaryp, Astanada eskertkishin ornatý máselesin kóterdi

ASTANA. QazAqparat - «Aıqyn» gazetiniń 6 maýsym, senbilik sanynda «Generaldyń qylyshyn shań basyp jata bere me?» degen taqyryppen maqala jaryq kórdi. Onda QR Premer-Mınıstriniń orynbasary Berdibek Saparbaevqa «Nur Otan» partııasynyń Májilistegi fraktsııasynyń músheleri, depýtattar: Baqytbek Smaǵul, Qaıyrbek Súleımenov, Baqytjan Ertaev jáne Abaı Tasbolatov dańqty general Sabyr Rahımovtyń jádigerlerin elge qaıtarý máslesin kótergen.

«Tashkendegi «Dańq» murajaıynda Sabyr Raqymovtyń 1926 jyly jaralanǵan kezde marshal Býdenyıdyń ózi bergen altyn sapty qylyshy, shıneli, bas kıimi - papahasy marapattary saqtalǵan bolatyn.

Ózbekstan baýyrlas el ǵoı, onda jaqsy dostarymyz da, janashyr tilektesterimiz de barlyǵy sózsiz. Sondyqtan, qurmetti Berdibek Mashbekuly, QR Syrtqy ister mınıstrligi arqyly resmı hat joldap, Qazaqstannyń Ózbekstandaǵy elshiligi kelissózder júrgizip, ol jádigerlerdi elimizge ákelýdiń múmkindikterin qarastyrýyńyzdy suraımyz», delingen hatta.

«Bul erlik pen eldiktiń sabaqtastyǵy úshin aýadaı qajet. Sabyr Raqymov sırek, dańqty batyr. Demek, onyń esimimen jáne erligimen baılanysty basty zattar Qazaqstannyń ortalyq mýzeılerinen oryn alsa, Er esimi eskerilip, eskertkishi Astana qalasynan boı kóterip jatsa, bul óskeleń urpaqty patrıottyq rýhta tárbıeleýge zor úles qosar edi», dep jazady «Aıqyn» basylymy. «Tirisinde elin erlikpen jaýdan qorǵaǵan, ólgen soń, qadiri bolmaǵan» dep urpaq jazǵyrmaýy úshin Uly Jeńis jylynda osyndaı izgi is qolǵa alynsa, ıgi bolar edi, - deıdi Májilis depýtattary Ba¬qytbek Smaǵul, Qaıyrbek Súleımenov, Baqytjan Ertaev jáne Abaı Tasbolatov.