Májilis depýtattary elektr energetıkasy nysandarynyń jumysyna qatysty zań jobasymen tanysty
ASTANA. 23 qańtar. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine elektr energetıkasy obektileriniń jumysyn baqylaýdy jáne qadaǵalaýdy uıymdastyrý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Indýstrııa jáne jańa tehnologııalar mınıstriniń orynbasary Baqytjan Jaqsalıevtiń aıtýynsha, Elbasynyń tapsyrmasymen ázirlengen zań jobasy memlekettik energetıkalyq qadaǵalaý jáne baqylaý júıesin jetildirýge baǵyttalǵan. «Búgingi tańda elimizdegi energetıka nysandarynda tekserý nátıjeleri boıynsha beriletin nusqamany oryndaý ákimshilik aıyppulmen qamtamasyz etiledi. Sondyqtan da, baqylaýdyń qoldanystaǵy fýnktsııasy jetkilikti túrde tıimdi emes», - deıdi zań jobasy boıynsha baıandaǵan vıtse-mınıstr. Onyń aıtýynsha, zań jobasymen energııa óndirýshi jáne energııa berýshi uıymdardyń kúzgi-qysqy kezeńge daıyndalý jáne ótkizý qaǵıdalary qamtamasyz etiledi. «1000 voltke deıingi jáne 1000 voltten joǵary elektr jelileri jáne jylý jelileri obektileriniń kúzet aımaqtaryn, osyndaı aımaqtardyń shekaralarynda ornalasqan jer ýchaskelerin paıdalanýdyń erekshe sharttaryn belgileý usynylady», - deıdi B. Jaqsalıev. Budan bólek, zań jobasymen elektr jelileriniń kúzgi-qysqy kezeńde jumys isteýge arnalǵan ázirlik pasporttarynyń talaptary buzylǵanda, paıdalanylatyn otyn qorynyń normalary buzylǵanda ákimshilik jaýaptylyq engizý qarastyrylǵan.
