Májilis depýtattary: ekologııalyq mádenıet – eldiń turaqty damýynyń alǵysharty

NUR-SULTAN. QazAqparat – QR Parlamenti Májilisiniń depýtattary «World cleanup Day» atty eń iri ekologııalyq aktsııaǵa qatysty.

Qazaqstan Dúnıejúzilik tazalyq kúnine Memleket Basshysynyń «Birge - taza Qazaqstan» aktsııasyn turaqty negizde ótkizý jónindegi tapsyrmalaryn iske asyrý aıasynda qosyldy.

Májilis depýtattary Nur-Sultan qalasynyń Esil ózeni boıyndaǵy saıabaq aýmaǵynda úıeńki, qaraǵash, emen, qaraǵaı, shyrsha, qaraǵaı kóshetterin otyrǵyzdy. Osylaısha depýtattar Nur-Sultannyń oń jaǵalaýyndaǵy qazaqstandyqtardyń belsendi demalysy úshin qolaıly da zamanaýı keńistikke aınaldyratyn aımaqty abattandyrýǵa óz úlesterin qosty.

Eldi kógaldandyrý - Memleket basshysy Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Joldaýynda qoıǵan mańyzdy mindetteriniń biri. Aldaǵy bes jylda orman qoryna 2 mıllıardtan astam, eldimekenderge 15 mıllıon aǵash otyrǵyzý josparlanyp otyr.

Búgingi tańda ekologııa jáne qorshaǵan ortany qorǵaý máseleleri Májilis depýtattarynyń únemi nazarynda. Osyǵan sáıkes, Palata ekologııalyq zańnamany jańǵyrtýǵa baǵyttalǵan birqatar zań jobalaryn ázirleý ústinde. Onyń ishinde jańa «Ekologııalyq kodekstiń» jobasy bar.

Sonymen qatar, Májilis depýtattary eldiń ekologııalyq ahýalyn jaqsartý úshin qajetti zańdar qabyldaý, ınnovatsııalyq tehnologııalardy engizý, aldyn alý sharalaryn ázirleý jáne halyqtyń ekologııalyq mádenıetin kóterýdi qajet dep sanaıdy. Depýtattardyń pikirinshe, bul halyqtyń ómir súrý sapasyn jaqsartýdyń jáne tutastaı alǵanda eldiń turaqty damýynyń qajetti alǵysharty.

Ár túrli ekologııalyq naýqandarǵa qatysý qorshaǵan ortaǵa uqypty jáne jaýapkershilikpen qaraýǵa, ekologııalyq qundylyqtardyń qalyptasýyna yqpal etedi.