Májilis depýtattary daǵdarysqa qarsy sharalardy iske asyrý jáne energııany únemdeýge qatysty Úkimetke usynystar joldady
Bul usynystardy búgin Májiliste ótken «Daǵdarysqa qarsy sharalardy iske asyrý jáne energııany únemdeý týraly» taqyrybynda Úkimet saǵatyn qorytyndylaǵan kezde QR Parlamenti Májilisi Tóraǵasynyń orynbasary Jánibek Káribjanov Palata depýtattary atynan jarııa etti, dep habarlaıdy QazAqparat.
Aıta ketý kerek, Úkimet saǵatynda QR Tabıǵı monopolııalardy retteý agenttiginiń tóraǵasy Nurlan Aldabergenov baıandama jasady.
Birinshiden, parlamentshiler tutynýshylar men retteletin sýbektiler arasynda múddeler teńgerimin qamtamasyz etýdi eskere otyryp, Qazaqstandaǵy ınflıatsııa qarqynyn tejeý, ortasha tarıf boıynsha jumys isteıtin tabıǵı monopolııalar sýbektileriniń sanyn arttyrý, qoldanystaǵy zańnamanyń sheńberinde normatıvtik tehnıkalyq ysyraptardyń deńgeılerin ońtaılandyrý jáne normatıvten tys ysyraptardy joıý qajettigin alǵa tartty.
Energııany únemdeýge degen yntalardy kúsheıtý maqsatynda tutyný kólemderine qaraı elektr energııasyna saralanǵan tarıfterdi esepteý ádistemesin jetildirý jumystaryn jalǵastyrýdy usyndy.
«Ekinshiden, tarıfter deńgeıiniń boljamdylyǵyn jáne turaqtylyǵyn, sonymen qatar tutynýshylarǵa tabıǵı monopolııalar sýbektilerimen kórsetiletin qyzmetterdiń sapasyn kóterý qamtamasyz etilsin. Osy máseleni sheshý úshin atalǵan agenttiktiń quzyretin kúsheıtý qajet. Úshinshiden, lıftilerge qyzmet kórsetý, qatty turmystyq qaldyqtardy jınaý jáne kádege jaratý, kómir óndirý men ony ótkizý jónindegi keńinen paıdalanatynyn qyzmetterdiń tutynýshylar úshin áleýmettik mańyzdylyǵyn eskere otyryp, memleket retteıtin baǵalardy qoldanatyn Ónimniń, taýarlar men qyzmetterdiń nomenklatýrasyna kórsetilgen qyzmetter engizilsin. Úıge ortaq muqtajdarǵa arnalǵan elektr jáne jylý energııasynyń qyzmetterine tutynýshylardan olarmen kelispeı aqy alý zańdylyǵynyń máselesi qaralsyn. Rettelip kórsetiletin qyzmetterdi tutynýshylardy qorǵaý maqsatynda Qazaqstan Respýblıkasynyń ákimshilik quqyqbuzýshylyq jáne Azamattyq kodeksterine kelesi máselelerdi kózdeıtin ózgerister men tolyqtyrýlar ázirlensin jáne engizilsin»,- dedi Májilis Tóraǵasynyń orynbasary J.Káribjanov.
Sonymen qatar qyzmet berýshiniń energııamen jabdyqtaý shartyn oryndaýdy birjaqty toqtata turýdy boldyrmaý, qyzmet berýshiniń turmystyq tutynýshylardy energııamen jabdyqtaýdy sottyń sheshimimen ǵana toqtatý, elektr jáne jylý energetıkasy salasyndaǵy retteletin naryq sýbektileriniń - qyzmet berýshilerdiń tutynýshylarǵa negizsiz shottar bergeni, olardy kórsetiletin qyzmetterden shektegeni jáne ajyratyp tastaǵany úshin ákimshilik jaýapkershilikti engizý kerektigin eskertti.
«Parlament pen Úkimetke aldymyzdaǵy jyldary energııa únemdeý boıynsha qyrýar jumys atqarýǵa týra keledi. Óıtkeni qoldanystaǵy zań, shyn máninde, jumys isteýge dármensiz.
Agentikke de básekelestiktiń damýyn kótermeleý, tabıǵı monopolııalar salasyndaǵy memlekettik retteýdiń tıimdiligin arttyrý, tabıǵı monopolııalar sýbektileriniń tarıfter deńgeıiniń boljamdylyǵyn jáne turaqtylyǵyn qamtamasyz etý úshin tarıf saıasatyn jetildirý boıynsha sonymen qatar, ádil básekelestik orta qalyptastyrý men ekonomıkalyq oıynshylardyń bárine birdeı jaǵdaı týǵyzýǵa baǵyttalǵan keń aýqymdy jumystar atqarý qajet»,- dedi J.Káribjanov.
